نگراں وزیر اطلاعات پنجاب عامر میر نے پی ٹی آئی وکیل لطیف کھوسہ کے حکومت پنجاب پر لگائے الزامات کو جھوٹ کا پلندا قرار دیتے ہوئے کہا کہ لطیف کھوسہ بھی اپنے کپتان کی طرح جھوٹے بولتےہیں۔

اپنے ایک بیان میں عامر میر کا کہنا تھا کہ پی ٹی آئی وکیل کے حکومت پنجاب پر لگائے الزامات بے بنیاد تھے، اسی لیے انہوں نے سپریم کورٹ سے بھاگنے میں عافیت جانی، سپریم کورٹ کے پلیٹ فارم کو سیاسی مقاصد کے لیے استعمال کرنے کی کوشش کی گئی جو ناکام ہو گئی، ایڈووکیٹ جنرل پنجاب نے سپریم کورٹ میں 200 صفحات کی رپورٹ میں الزامات کو جھوٹا ثابت کر دیا تھا۔

نگراں وزیراطلاعات پنجاب نے مزید کہا کہ پی ٹی آئی نے حکومت پنجاب کے دفاع کا جواب دینے کے لیے 3 دن مانگے مگر کوئی جواب نہ دیا گیا، ایک بھی کیس میں کسی پی ٹی آئی امیدوار کا اغواء یا کاغذات نامزدگی چھیننا ثابت نہیں ہوا۔

ان کا یہ بھی کہنا تھا کہ پنجاب کا ریکارڈ ظاہر کرتا ہے کہ تمام اہل امیدواروں کے کاغذات نامزدگی کو قبول کیا گیا، پی ٹی آئی ٹھوس حقائق سامنے لانے میں ناکام رہی اور اسی لیے پٹیشن واپس لی۔