پیٹرولیم مصنوعات کی قیمتوں میں کمی کے بعد لاہور کی ضلعی انتظامیہ متحرک ہوگئی ہے، محکمہ ٹرانسپورٹ نے کرایوں میں دس فیصد تک کمی کردی گئی۔

گزشتہ روز نگراں وزیر اعلیٰ پنجاب محسن نقوی کی ہدایت کے بعد ڈپٹی کمشنر لاہور رافعہ حیدر اور سیکریٹری آر ٹی اے نے مختلف بس اسٹینڈز کا دورہ کیا اور ٹرانسپورٹرز کو کرائے کم کرنے کی ہدایت کی۔

نگران وزیراعلیٰ پنجاب محسن نقوی نے ڈپٹی کمشنرز کو انٹرسٹی ٹرانسپورٹ کے کرائے میں کمی کا ٹاسک دیتے ہوئے آج رات تک کرائے کم نہ کرنے والے ٹرانسپورٹرز کے خلاف کارروائی کا حکم دیا ہے۔

جس کے بعد راولپنڈی سے کراچی کا کرایہ 6000 سے کم ہو کر 5700 روپے ہو گیا۔

ادھر اسلام آباد میں پیٹرولیم مصنوعات کی قیمتوں میں کمی کے اثرات عوام تک نہ پہنچ سکے، اس پر شہریوں کا کہنا ہے کہ انتظامیہ کو کرائے ناموں پرعمل کرانے کیلئے اقدامات کرنا ہوں گے۔

اسلام آباد کے باسیوں نے کہا کہ جب پیٹرول مہنگا ہوتا ہے تو کرائے ڈبل کردیتے اور جب سستا ہوتا تو نہ ہونے کے برابر کمی کی جاتی ہے۔

دوسری جانب خیبرپختونخوا میں بس اڈے پر ٹرانسپورٹرز کی من مانیاں جاری ہیں، پیٹرولیم مصنوعات کی قیمتوں میں کمی تو ہوگئی لیکن کرائے کم نہ ہوسکے۔