لاہور میں جماعت اسلامی کے زیر اہتمام فلسطین کے حق میں آج ’غزہ مارچ‘ ہوگا، جو پنجاب یونیورسٹی کیمپس پُل سے شروع ہوگا۔ امیر جماعت اسلامی سراج الحق کا کہنا ہے کہ یہ تاریخ کا سب سے بڑا مارچ ہوگا۔

غزہ مارچ میں کارکن بڑی تعداد میں شریک ہوں گے، جس سے امیر جماعت اسلامی پاکستان سراج الحق اور دیگر رہنما شرکاء سے خطاب کریں گے۔

امیرجماعت اسلامی سراج الحق کا کہنا ہے کہ تاریخ کا سب سے بڑا مارچ آج غزہ مارچ کے نام سے ہوگا، ہر طبقے کے لوگ غزہ کے عوام کا دکھ محسوس کرتے ہیں۔

لاہور میں میڈیا سے گفتگو کرتے ہوئے کہا کہ مارچ سے دشمن کو پیغام ملے گا کہ فلسطینی اکیلے نہیں ہیں اور پاکستانی قوم فلسطینیوں کے ساتھ ہے۔

انہوں نے کہا کہ یقین تھا اسرائیل اوآئی سی اجلاس کے بعد ظالمانہ کارروائیاں بند کرے گا مگر او آئی سی اجلاس کے بعد اسرائیل کی کارروائیوں میں شدت آئی ہے۔