اسلام آباد ہائیکورٹ میں شہریوں کی غیر قانونی حراست کی درخواست پر سماعت ہوئی جس میں ایف آئی اے نے عدالت کو بتایا کہ پولیس کے 11 اہلکاروں کیخلاف مقدمہ درج کرکے 5 کو گرفتار کرلیا گیا ہے۔عدالت نے تفتیش مکمل ہونے پر درخواست نمٹاتے ہوئے کہا ہے کہ ایف آئی اے قانون کے مطابق ٹرائل کورٹ میں کیس آگے چلائے۔

بی بی سی اردو کے مطابق اسلام آباد ہائی کورٹ میں مقامی رہائشی خاتون معراج بی بی کی بچوں کو سی آئی اے کی غیرقانونی حراست میں رکھنے کے خلاف دائر درخواست پر سماعت ہوئی۔ کیس کی سماعت جسٹس بابر ستار نے کی۔

عدالت عالیہ میں ایف آئی اے نے رپورٹ جمع کرواتے ہوئے بتایا کہ عدالت کے حکم پر 11 ملوث اہلکاروں کے خلاف مقدمہ درج کر لیا گیا اور 5 اہلکار وں کو گرفتار کیا جاچکا ہے جبکہ باقی ضمانت پر ہیں، معاملے کی تفتیش مکمل کرلی گئی ہے۔

اسلام آباد ہائی کورٹ نے پوچھا کہ کیا کیس کا چالان جمع ہوگیا ہے۔ جس پر ایف آئی اے کے افسر نے جواب دیا کہ کسی بھی مقدمے کا چالان جمع نہیں ہوا تاہم اگلے ہفتے جمع کروا دیا جائے گا۔

ایف آئی اے افسر نے عدالت کو یقین دہانی کروائی کہ آئندہ ہفتے مقدمے کا چالان ٹرائل کورٹ میں پیش کر دیا جائے گا۔

عدالت عالیہ کی جانب سے سرکاری وکیل سے پوچھا گیا کہ اس کیس میں آئی جی نے کیا کیا۔

یہ بھی پڑھیں :

شمالی وزیرستان میں دہشت گردوں سے جھڑپ میں پاک فوج کے 2 جوان شہید

فیض آباد دھرنا کیس: حکومت ذمہ داران کے تعین کیلئے کمیشن تشکیل دے، تحریری حکم نامہ

سرکاری وکیل نے عدالت کو بتایا کہ آئی جی کی طرف سے نامزد اہلکاروں کے خلاف محکمانہ کارروائی کی جاری ہے اور شوکاز نوٹس جاری کیے گئے۔