کوئٹہ شہرسمیت بلوچستان کے مختلف شہروں میں تیزہواؤں کے ساتھ بارش ہوئی، بارش کے بعد سردی کی شدت میں اضافہ ہوگیا۔ خیبرپختونخوا میں بھی بارش اور برفباری کے امکان کے پیش نظر پی ڈی ایم اے نے ہدایات جاری کردی ہیں۔

بارش کے باعث امداد چوک، زرغون روڈ، جی پی او چوک میں پانی سڑکوں پر جمع ہوگیا۔

سرما کے آغاز کی وجہ سے شہرمیں شردی کی شدت میں اضافہ ہوگیا ہے۔

دوسری جانب محکمہ موسمیات نے خیبرپختونخوا میں بارشوں اور بالائی اضلاع میں برفباری کاامکان ظاہرکیا ہے۔

پی ڈی ایم اے نے تمام ضلعی انتظامیہ کوالرٹ رہنے کیلئے مراسلہ جاری کردیا۔ تیزبارشوں اور ہواؤں کے پیش نظرضلعی انتظامیہ کوپیشگی اقدامات اٹھانے کی ہدایت کی گئین ہے۔

مراسلے میں کہا گیا ہے کہ درجہ حرارت میں 2 سے 3سینٹی گریڈ تک کمی کا امکان ہے۔

ڈی جی پی ڈی ایم اے کے مطابق ضلعی انتظامیہ کو چھوٹی بھاری مشینری کی دستیابی یقینی بنانے اور برساتی نالوں کی نگرانی کی ہدایت کی گئی ہے۔

مراسلے میں کہا گیا ہے کہ طوفان کی صورت میں عوام بجلی کی تاروں، بوسیدہ عمارتوں و تعمیرات، سایئن بورڈز اور بل بورڈز سے دور رہیں۔ حساس بالائی علاقوں میں سیاحوں اور مقامی آبادی کو موسمی حالات سے باخبر رہنے اور احتیاتی تدابیر کی ہدایت کی گئی ہے۔

پی ڈی ایم اے کا کہنا ہے کہ حساس اضلاع میں ضلعی انتظامیہ کو مقامی آبادی تک پیغامات مقامی زبانوں میں پہنچائے جائیں۔ کسی بھی ہنگامی صورتحال میں تمام متعلقہ ادارے روڈ لنکس کی بحالی میں چوکس رہیں اورسڑک کی بندش کی صورت میں ٹریفک کے لئے متبادل راستے فراہم کئے جائیں۔

حساس علاقوں میں صوبائی اور قومی شاہراہوں پرمسافروں کو پیشگی خبردار کرنے کے علاوہ متعلقہ حکام سے بوقت ضرورت لوگوں کومحفوظ انتظار گاہوں کی جانب منتقل کرنے کی ہدایت بھی کی گئی ہے۔

پی ڈی ایم اے کے مطابق بارشوں اور برفباری کا سلسلہ 10 نومبر تک جاری رہنے کا امکان ہے، شمالی علاقہ جات جانے والے سیاح اس دوران خصوصی احتیاطی تدابیر اختیار کریں۔