لاہورمیں طاقت کے نشے میں دھت ملزمان نے گاڑی کو غلط پارک کرنے سے منع کرنے پر ڈیفنس کےعلاقے میں سیکیورٹی گارڈ کو تشدد کا نشانہ بنایا۔

ملزمان کے گارڈ پرتشدد کی فوٹیج سامنے آگئی ہے۔ یہ واقعہ دو روز پُرانا ہے۔

فوٹیج میں دیکھا جاسکتا ہے کہ گاڑی کو غلط جگہ کھڑی کرنے سے منع کرنے پرڈرائیور نے گارڈ پر ہی گاڑی چڑھانے کی کوشش کی۔

اس دوران مسلح افراد نے گاڑی سے اتر کر گارڈ پر تشدد کیا۔

پولیس کے مطابق گارڈ پرتشدد کرنے والتے نامعلوم ملزمان کے خلاف اقدام قتل کی دفعات کے مقدمہ درج کرلیا گیا ہے اور ملزمان کی گرفتاری جلد عمل میں لائی جائے گی۔

اس واقعے کے بعد وفاقی وزیر احسن اقبال نے ٹوئٹر پر اپنے ٹویٹ میں کہا کہ یہ لاہور پولیس کے لیے ایک ٹیسٹ کیس ہے، یہ واقعہ واقعی شرمناک عمل ہے، ہماری اشرافیہ قانون سے بالاتر نہیں ہے۔