وفاقی وزیر داخلہ رانا ثناء اللہ کا کہنا ہے کہ پارٹی سینئر نائب صدر مریم نواز پنجاب کی وزیراعلیٰ بن سکتی ہیں۔

لندن میں میڈیا سے گفتگو کرتے ہوئے رانا ثناء اللہ نے کہا کہ پرویز الٰہی کی کوئی چال نہیں تھی، انہوں نے دو نمبری کی، پہلے کہا تھا اسمبلی نہیں توڑوں گا، پرویز الٰہی پر پھٹکار پڑے گی۔

وزیر داخلہ نے کہا کہ پنجاب کے انتخابات میں ن لیگ کامیابی حاصل کرے گی، صوبے میں ہمارے پورے نمبر ہیں، ووٹ اور سپورٹ نواز شریف کی ہے، لوگ انہیں کو ووٹ دیں گے۔

پنجاب الیکشن تاخیر کے امکانات ظاہر کرتے ہوئے رانا ثناء اللہ کا کہنا تھا کہ ہوسکتا ہے کہ پنجاب میں انتخابات تین ماہ میں نہ ہوں، البتہ مریم اگلے ہفتے پاکستان آرہی ہے اور وہ وزیراعلیٰ بھی بن سکتی ہیں۔

دوسری جانب قائد ن لیگ نواز شریف کا کہنا تھا کہ ہم نے پاکستان کو مشکلات سے باہرنکالنے کے لیے حکومت لی تھی، عمران خان کے 4 سال کا میرے 4 سال سے مقابلہ کرکے دیکھیں، ہمارے دور میں لوگ نسبتاً زیادہ خوشحال تھے۔