ڈیرہ غازی خان کے ملتان روڈ پر شدید دھند کے باعث ٹریفک کے دو مختلف حادثات میں ایک شخص جاں بحق جبکہ 12 زخمی ہوگئے۔

ریسکیو حکام کے مطابق ڈیرہ غازی خان کے ملتان روڈ پر شدید دھند کے باعث رند اڈا کے مقام پر مسافر بَس اور مَزدا آپس میں ٹکرا گئی۔

حادثے میں ایک شخص موقع پر ہی جاں بحق ہوگیا جبکہ دیگر چار زخمیوں کو قریبی اسپتال منتقل کردیا گیا۔

دوسرا حادثہ غازی گھاٹ کے مقام پر پیش آیا جہاں کیری وین مخالف سمت آنے والے ٹرک سے ٹکراگئی جس کے نتیجے میں 8 افراد زخمی ہوگئے۔

تمام افراد کو ٹیچنگ اسپتال منتقل کردیا گیا، ڈاکٹروں کے مطابق اسپتال لائے گئے زخمیوں میں سے چار کی حالت تشویشناک بتائی جارہی ہے۔