پنجاب میں دھند کا راج برقرار ہے، دھند کے باعث موٹروے کو مختلف مقامات سے ٹریفک کے لئے بند کردیا گیا۔

پنجاب کے مختلف شہروں میں آج بھی دھند کا بسیرا ہے، جس کے باعث رات گئے ٹریفک کی روانی متاثر رہی ۔

شدید دھند کے باعث موٹروے ایم 2 ٹھوکر نیاز بیگ سے ہرن مینار اور موٹروے ایم 3 فیض پور سے سمندری تک بندی کردی گئی ۔

اس کے علاوہ موٹروے ایم 5 کو شیر شاہ سے ظاہر پیر شاہ اور موٹروے ایم 11 کو لاہور ٹول پلازہ سے سمبڑیال تک شدید دھند کے باعث بند کردیا گیا۔

موٹروے پولیس نے شہریوں کو ہدایت کی ہے کہ دھند کے دوران گاڑیوں میں فوگ لائٹس کا استعمال کریں اور غیر ضروری سفر سے گریز کریں۔

دوسری جانب خوشاب میں سرگودھا روڈ پر ٹریکٹر ٹرالی اور وین میں تصادم کے نتیجے میں دلہا سمیت 3 افرادجاں بحق اور 8 زخمی ہوگئے۔