سینیٹر اسحاق ڈار کے بعد وزیراعظم شہباز شریف کے صاحبزادے سلمان شہباز نے بھی پاکستان واپس آنے کا فیصلہ کرلیا۔

سلمان شہباز نے حفاظتی ضمانت کے لئے اسلام آباد ہائیکورٹ سے رجوع کر لیا ہے، انہوں نے امجد پرویز ایڈووکیٹ کے ذریعے اسلام آباد ہائیکورٹ میں درخواست دائر کی۔

وزیراعظم کے صاحبزادے نے ایف آئی اے اینٹی کرپشن سرکل لاہور کی جانب سے اینٹی منی لانڈرنگ ایکٹ کے تحت درج مقدمے میں حفاظتی ضمانت کے لئے درخواست جمع کرائی، جس میں وفاق، ڈی جی ایف آئی اے اسلام آباداورڈی جی ایف آئی اے لاہورکوفریق بنایا گیا ہے۔

درخواست میں مؤقف اختیار کیا گیاکہ سلمان شہباز کبھی پبلک آفس ہولڈر نہیں رہے، منی لانڈرنگ کے الزامات جھوٹے اور بے بنیاد ہیں، وہ 27 اکتوبر 2018 کو ملک سے باہر گئے، ایف آئی اے اینٹی کرپشن سرکل نے ان کی عدم موجودگی میں 14 نومبر 2020 کو مقدمہ درج کیا۔

درخواست میں مزید کہا گیا ہے کہ سلمان شہباز کو اشتہاری قرار دینے کی کارروائی بھی عدم حاضری میں ہوئی جبکہ مقدمہ اندراج سے قبل ایف آئی اے کی جانب سے وضاحت کے لیے طلبی کے نوٹس بھی موصول نہیں ہوئے۔

سلمان شہباز نے درخواست میں عدالت سے استدعا کی کہ 2ہفتے کی حفاظتی ضمانت منظور کی جائے تاکہ ملک واپس آ کرمتعلقہ عدالت میں پیش ہو جاؤں۔