مسلم لیگ (ن) کے رہنماشاہد خاقان عباسی نے ایک بار پھر نیب کو ختم کرنے کا مطالبہ کرتے ہوئے کہا کہ ہمارا مجرم نیب کا چیئرمین ہے، اس سے ہم نے حساب لینا ہے ۔

اسلام آباد کی احتساب عدالت کے باہر میڈیا سے گفتگو کرتے ہوئے شاہد خاقان عباسی نے کہا کہ احتساب کا نام نہاد جاری سلسلہ صرف سیاستدانوں کو بدنام کرنے کے لیے ہے، نیب نے ہم پر کوئی کرپشن کا الزام نہیں لگایا، ہمارا اخباروں میں نام آتا ہے لیکن کیس میں کچھ نہیں۔

ان کا مزید کہنا تھا کہ آج کل اعتراف کا زمانہ ہے، جسٹس ریٹائرڈ جاوید اقبال بھی اس کا اعتراف کر لیں۔

سابق وزیراعظم شاہد خاقان عباسی نے ملک کی بقا کے لئے نیب کو ختم کرنے کا مطالبہ بھی دہرایا اور کہا کہ کئی سال سے یہاں آرہا ہوں اور 70 پیشیاں بھگت چکا ہوں، ہمارا مجرم نیب کا چیئرمین ہے ،اس سے ہم نے حساب لینا ہے ۔

دوسری جانب جج اعظم خان کی مدت ملازمت مکمل ہونے پر نیا جج تعینات نہ ہو سکا۔

احتساب عدالت اسلام آباد نے سابق وزیر اعظم شاہد خاقان عباسی و دیگر کے خلاف ایل این جی ریفرنس پر سماعت بغیر کارروائی20 دسمبر تک ملتوی کر دی۔