قائد آباد میں سات سالہ بچی کے ساتھ زیادتی اور قتل کے واقعے پر پولیس نے مخلتف علاقوں میں آپریشن کر کے 4 مشکوک افراد کو حراست میں لے لیا۔

پولیس کے مطابق حراست میں لیے گئے مشکوک افراد سے تفتیش کی جارہی ہے، واقعے کا مقدمہ بھی قائدآباد تھانے میں درج کرلیا گیا ہے۔

اسے سے قبل، کراچی کے علاقے لانڈھی میں کچراکنڈی سے ملنے والی سات سالہ بچی کی پوسٹ مارٹم رپورٹ میں زیادتی کے شواہد مل گئے، بچی کو بدھ کی دوپہر گھر کے باہر سے اغوا کیا گیا تھا۔

پوسٹ مارٹم رپورٹ کے مطابق بچی کے ساتھ زیادتی کے بعد تشدد کیا گیا، بچی کے سر پر بھی شدید نوعیت کے زخم ہیں۔

بچی کے والد کا کہنا ہے کہ بچی بدھ کی دوپہر سے غائب ہوئی تھی، دو روز تک پولیس اغوا کا مقدمہ درج کرنے کے بجائے ٹال مٹول کرتی رہی، لاش ملنے کی اطلاع بھی رشتہ داروں نے دی۔

ان کا کہنا تھا کہ ان کی لخت جگر تو دنیا سے رخصت ہوگئی، مگر دعاگو ہیں کہ آئندہ کبھی کسی والدین کو یہ دکھ نہ دیکھنا پڑے۔

یاد رہے کہ ملزم نے بچی کے ساتھ زیادتی کرکے تشدد زدہ لاش کچرا کنڈی میں پھینک دی تھی۔