پی ٹی آئی سینیٹر اعظم سواتی کے کچھ دنوں بعد ہی رہنما مسلم لیگ (ن) پرویز رشید کی بھی مبینہ نازیبا ویڈیو لیگ ہوگئی ہے۔

اس ضمن میں سوشل میڈیا پر پی ٹی آئی رہنما نے مبینہ ذاتی ویڈیو لیک ہونے پر شدید مذمت کی ہے۔

پی ٹی آئی رہنما شہباز گل کا ایک بیان میں کہنا ہے کہ سوشل میڈیا سے پتہ چلا کہ پرویز رشید صاحب کی کوئی وڈیو لیک کی گئی، اس عمل کی کھل کر مذمت کرتا ہوں۔

شہباز گل نے کہا کہ پرویز رشید ہوں یا کوئی اور سب کی عزت اور پرائیویسی کا احترام ضروری ہے، پہلے وزیراعظم کے دفتر کی آڈیو جاری کی گئیں اور اب لوگوں کی وڈیوز، اس معاشرے کی اخلاقیات کو تباہ کیا جا رہا ہے۔

دوسری جانب تحریک انصاف ہی کے حماد اظہر نے ویڈیو لیک کرنے کو حکومت کی ایک سازش قرار دیتے ہوئے کہا کہ پرویز رشید کی ویڈیو شاید اس لئے لیک کی گئی ہے تا کہ جب اصلی ہدف یعنی پی ٹی آئی کو نشانہ بنایا جائے تو شک کا دائرہ وسیع رہے۔

انہوں نے ٹویٹ میں لکھا کہ ’ویسے بھی اعظم سواتی کہ معاملے پر بہت تھو تھو ہو رہی ہے۔ اور ایسا ہی وزیراعظم ہاؤس کی لیکس میں ہوا۔ دونوں طرف کی لیکس کے بعد اُسے کسی نجی گروہ کی سازش کہا گیا۔‘

خیال رہے کہ اس سے قبل پی ٹی آئی سینیٹر اعظم سواتی کی بھی مبینہ ذاتی ویڈیو لیک ہوئی تھی جسے ایف آئی اے جعلی قرار دے چکی ہے جب کہ سینیٹ میں اس حوالے سے اسپیشل کمیٹی قائم کی گئی ہے۔