اسلام آباد ہائیکورٹ نے اڈیالہ جیل کو حراستی کیمپ سے تشبیہ دے دی ، عدالت نے قومی انسانی حقوق کمیشن کواڈیالہ جیل میں تشدد کے معاملے کی تحقیقات کا حکم دے دیا۔

اسلام آبادہائیکورٹ میں اڈیالہ جیل راولپنڈی میں قیدیوں پر تشدد سےمتعلق درخواست کی سماعت ہوئی۔

عدالت نے اپنے حکم نامے میں لکھا کہ قیدی کی جانب سے دائر درخواست میں لگائے گئے الزامات بادی النظر میں بے بنیاد نہیں ہیں، خفیہ رپورٹ کے مطابق اڈیالہ جیل کو قانون کے مطابق چلانے کے بجائے حراستی کیمپ بنا دیا گیا ہے۔

حکم نامے میں کہا گیا کہ اڈیالہ جیل میں قیدیوں سے غیرانسانی سلوک کیا جاتا ہے اور انسانی حقوق کی سنگین خلاف ورزیاں ہوتی ہیں۔

حکم نامے میں اسلام آبادہائیکورٹ نے قومی انسانی حقوق کمیشن کو اڈیالہ جیل میں ہونے والی انسانی حقوق کی پامالیوں کی تحقیقات کا حکم دیا۔

حکم نامے میں مزید کہا گیا کہ قومی انسانی حقوق کمیشن کےممبرپنجاب رپورٹ جلد سےجلد عدالت میں جمع کرائیں۔