عدالتی تحویل سے پاسپورٹ واپس لینے کیلئے مسلم لیگ (ن) کی نائب صدر مریم نواز کی درخواست سماعت کیلئے مقرر کر دی گئی، چیف جسٹس لاہور ہائیکورٹ کی سربراہی میں 3 رکنی فُل بینچ 14 ستمبر کو کیس کی سماعت کرے گا۔

چیف جسٹس لاہور ہائیکورٹ نے مریم نواز کی پاسپورٹ واپسی کیلئے درخواست پر سماعت کیلئے فل بینچ تشکیل دے دیا۔

مریم نواز کی درخواست 14 ستمبر کو سماعت کیلئے مقرر کی گئی ہے، فل بینچ کی سربراہی چیف جسٹس امیر بھٹی کریں گے جبکہ دیگر دو ارکان میں جسٹس علی باقر نجفی اور جسٹس طارق سلیم شیخ شامل ہیں۔

اس سے قبل جسٹس علی باقر نجفی کی سربراہی میں بننے والے 2 رکنی ڈویژنل بینچ کے رکن جسٹس انوار الحق پنوں نے سماعت سے معذرت کرلی تھی۔

مریم نواز نے درخواست میں مؤقف اختیار کیا ہے کہ چوہدری شوگر مل کیس میں ان کا پاسپورٹ 4 سال سے عدالت کی تحویل میں ہے جبکہ عدالت نے میرٹ پر ان کی ضمانت منظور کی تھی۔

درخواست میں مزید کہا گیا کہ ایک لمبے عرصے کیلئے کسی شخص کو اس کے بنیادی حق سے محروم نہیں رکھا جا سکتا، لہٰذا عدالت پاسپورٹ واپس کرنے کا حکم دے۔