وزیراعلیٰ پنجاب چوہدری پرویزالہٰی نے سیلاب کے خدشے کے پیش نظر متعلقہ اداروں کو الرٹ رہنے کا حکم دے دیا۔

وزیراعلیٰ پنجاب نے سیلاب کے خدشے کے پیش نظر میانوالی کی انتظامیہ اور متعلقہ اداروں کو الرٹ رہنے کا حکم جاری کردیا۔

چوہدری پرویزالہٰی نے کہا کہ کسی بھی صورتحال سے نمٹنے کے لیے تمام تیاریاں مکمل رکھی جائیں، دریائے سندھ میں پانی کے بہاؤ کو 24 گھنٹے مانیٹر کیا جائے، لوگوں کے بروقت انخلاء کے لیے تمام وسائل بروئے کار لائے جائیں، متعلقہ افسران دریا کے بند اور حفاظتی پشتوں کا موقع پر جا کر خود جائزہ لیں۔

وزیراعلیٰ پنجاب کا کہنا تھا کہ ادویات، پینے کے صاف پانی، مویشیوں کیلئے چارہ اور ضروری ساز و سامان کا وافر اسٹاک رکھا جائے، حفاظتی انتظامات ہر لحاظ سے مؤثر اور جامع ہونے چاہئیں، کشتیاں، ڈی واٹرنگ سیٹ اور دیگر آلات 100فیصد فنکشنل ہونے چاہئیں۔