اسلام آباد: وزیراعظم شہبازشریف نے کہا ہے کہ بھارت جابرانہ ہتھکنڈوں سے مسلمانوں کو دبانے کی کوشش کررہا ہے۔

ٹوئٹر پر اپنے بیان میں وزیراعظم شہباز شریف نے کہا کہ بھارت کے ان اقدامات کا مقصد مسلمانوں کو سیاسی، معاشی اورثقافتی لحاظ سے دیوار سے لگانا ہے۔

ان کا کہنا تھا کہ اب بھارت کا اصل " جمہوری چہرہ" دنیا کے سامنے عیاں ہوچکا ہے ۔

وزیراعظم شہباز شریف کا یہ بیان اتر پردیش میں متعدد مسلمان افراد کے گھروں کو مسمار کرنے کے بعد سامنے آیا ہے۔

بی جے پی کے دو ارکان نوپور شرما اور نوین کمار جندال کے اسلام مخالف تبصروں کے خلاف مسلمان بھارت بھر میں سڑکوں پر ہیں۔

دوسری جانب بی جے پی نے نوپور شرما کو معطل جبکہ جندال کو برطرف کر دیا ہے۔