سندھ کے کئی علاقے شدید گرمی کی لپیٹ میں ہیں، کراچی میں بدھ (23 اپریل) تک ہیٹ ویو کا امکان ہے، درجہ حرارت 40 ڈگری سے اوپر جا سکتا ہے جبکہ محکمہ موسمیات کی جانب سے الرٹ جاری کردیا گیا، دوسری طرف ملک کے بیشترعلاقوں میں آج موسم گرم اور خشک رہنے کا امکان ہے، کشمیر، گلگت بلتستان اور بالائی خیبرپختونخوا میں چند مقامات پر تیز ہواؤں اور گرج چمک کے ساتھ بارش ہو سکتی ہے۔

کراچی میں سورج آج بھی آگ برسائے گا، محکمہ موسمیات نے شہر میں شدید گرمی کی پیشگوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔

رپورٹ کے مطابق آج کراچی میں درجہ حرارت 41 ڈگری سینٹی گریڈ تک جا سکتا ہے جبکہ اس وقت شہر کا درجہ حرارت 31 ڈگری ریکارڈ کیا گیا ہے۔

محکمہ موسمیات کے مطابق کراچی میں 23 اپریل تک ہیٹ ویو کی صورتحال برقرار رہنے کا امکان ہے، شہر میں آج بھی سمندری ہوائیں بند رہیں گی جبکہ شمال مشرق اور مغربی سمت سے گرم ہوائیں دن بھر چلتی رہیں گی، جن کی رفتار 3 کلومیٹر فی گھنٹہ ریکارڈ کی گئی ہے۔

ماہرین نے بتایا کہ دن کے اوقات میں موسم شدید گرم اور خشک رہے گا اور راتوں میں بھی گرمی برقرار رہنے کا امکان ہے، مطلع صاف ہے اور تیز دھوپ کی وجہ سے گرمی کی شدت مزید بڑھ گئی ہے جبکہ ہوا میں نمی کا تناسب 37 فیصد ہے۔

فضائی معیار سے متعلق ایئر کوالٹی انڈیکس (اے کیو آئی) کی رپورٹ میں کہا گیا ہے کہ ہواؤں کی سمت میں تبدیلی کی وجہ سے کراچی کا فضائی معیار مضر صحت قرار دیا گیا ہے۔

اے کیو آئی کے مطابق کراچی دنیا کے آلودہ ترین شہروں میں تیسرے نمبر پر ہے جبکہ شہر میں آلودہ ذرات کی مقدار 159 پرٹیکیولیٹ میٹر ریکارڈ کی گئی ہے۔

محکمہ موسمیات اور ماہرین صحت نے شہریوں کو سخت ہدایت کی ہے کہ وہ غیر ضروری طور پر باہر نکلنے سے گریز کریں، خاص طور پر سورج کی براہ راست تپش سے بچیں، پانی کا زیادہ استعمال کریں اور دھوپ میں سر کو ڈھانپ کر رکھیں۔

یاد رہے کہ گزشتہ روز شہر قائد میں دن کے وقت پارہ 40 ڈگری تک جا پہنچا، سمندری ہوائیں بند ہوئیں اور گرمی کی شدت سے لوگ بلبلا اٹھے۔

مٹھی اور نواب شاہ میں سب سے زیادہ گرمی پڑی، پارہ 42 ڈگری سینٹی گریڈ تک جاپہنچا، حیدرآباد اور دادو میں 41 سکھر میں 40 اور ٹھٹھہ میں 37 ڈگری سینٹی گریڈ کی گرمی نے ستایا۔

پنجاب میں بھی سورج آنکھیں دکھارہا ہے، ڈیرہ غازی خان میں پارہ 40 ، لاہور اور ملتان میں 39 ڈگری کی گرمی سے لوگ نڈھال ہوگئے۔

کراچی کا کا موسم شدید گرم اور خشک، درجہ حرارت 41 ڈگری تک جانے کا امکان

فیصل آباد اور سرگودھا میں درجہ حرارت 38 سینٹی گریڈ تک پہنچا، بلوچستان میں بھی گرمی کی لہربرقرار ہے، سبی اور گوادر میں درجہ حرارت 38 سینٹی گریڈ ریکارڈ کیا گیا۔

محکمہ موسمیات کے مطابق سندھ ،پنجاب اور بلوچستان کے بیشتر اضلاع میں رات بھی موسم گرم اور خشک رہنے کا امکان ہے۔

اسلام آباد اور راولپنڈی میں تیز ہواؤں کے ساتھ بارش اور ژالہ باری

دوسری جانب سندھ گرمی میں جھلس رہا ہے جبکہ بالائی علاقوں میں بارش اور برف باری ہو رہی ہے، اسلام آباد اور راولپنڈی میں تیز ہواؤں کے ساتھ بارش اور ژالہ باری ہوئی، آزاد کشمیر اور غذر میں برف باری ہوئی۔

اسلام آباد اور راولپنڈی میں وقفے وقفے سے بارش اورژالہ باری کا سلسلہ جاری ہے، ٹھنڈی ٹھنڈی ہوائیں بھی چلتی رہیں، ہری پور میں تیزہواؤں کے ساتھ بارش سے موسم خوشگوار ہے۔

مظفرآباد میں تیز آندھی، بارش اور ژالہ باری ہوئی، پہاڑوں پر برفباری سے جاتی سردی لوٹ آئی۔ دریائے نیلم اور جہلم میں پانی کی سطح تیزی سے بلند ہورہی ہے۔

گلگت بلتستان میں بارش اوربرفباری کا سلسلہ رک نہ سکا، غذر میں برفباری 4 روز سے جاری ہے، درجہ حرارت دوسرے روز بھی نقطہ انجماد سے نیچے گرگیا۔

محکمہ موسمیات نے کشمیر سمیت راولپنڈی، اسلام آباد میں مزید بارش اورژالہ باری کی خبر دی ہے جبکہ بالائی خیبرپختونخوا میں بھی طوفانی موسم کی پیشگوئی ہے۔

خیبرپختونخوا میں موسم خشک اور گرم رہنے گا

ادھر محکمہ موسمیات کے مطابق خیبر پختونخوا میں موسم خشک اور جنوبی اضلاع میں دن کے اوقات میں موسم گرم رہنے کا امکان ہے، آئندہ 24 گھنٹوں کے دوران بالائی اضلاع میں بادل برسنے کا امکان ہے جبکہ چترال، دیر، سوات، شانگلہ، کوہستان، مانسہرہ میں بارش کی پیشگوئی کی گئی ہے۔

پنجاب اور سندھ میں شدید گرمی کی لہر، درجہ حرارت 48 ڈگری سینٹی گریڈ تک پہنچنے کا امکان، الرٹ جاری

گذشتہ روز چترال، دیر، سوات، کوہستان، مانسہرہ اور ابیٹ آباد میں بارش ہوئی، دیر میں 24، کالام 22، تیمرگرہ 13، چترال میں 10 ملی میٹر بارش ریکارڈ ہوئی۔

پشاورکا کم سے کم درجہ حرارت 19 ڈگری سینٹی گریڈ ریکارڈ کیا گیا، شہر کا زیادہ سے زیادہ درجہ حرارت 36 ڈگری سینٹی گریڈ تک جانے کا امکان ہے۔

سب سے کم درجہ حرارت کالام اور مالم جبہ میں 5 ڈگری سینٹی گریڈ ریکارڈ کیا گیا جبکہ ڈی آئی خان میں پارا 39 ڈگری سینٹی گریڈ تک جانے کا امکان ہے۔