پنجاب حکومت نے غیر منقولہ جائیداد کے کم تخمینے کی شکایات کا نوٹس لیتے ہوئے اسٹامپ ڈیوٹی ایکٹ 1899 میں اہم ترمیم کرنے کا فیصلہ کر لیا ہے۔ اس حوالے سے ”دی اسٹامپ ڈیوٹی ترمیمی ایکٹ 2025“ کے نام سے بل پنجاب اسمبلی میں پیش کر دیا گیا ہے، جو اب متعلقہ قائمہ کمیٹی کے سپرد کر دیا گیا ہے۔ کمیٹی دو ماہ میں اس پر رپورٹ پیش کرے گی۔

ترمیمی بل میں تجویز دی گئی ہے کہ اگر کسی غیر منقولہ جائیداد کا تخمینہ کم لگے تو شہری کمشنر کے پاس اپیل کر سکیں گے۔ اس سے قبل صرف زیادہ تخمینہ لگنے پر ہی اپیل کی جا سکتی تھی، جبکہ کم تخمینہ ہونے کی صورت میں کوئی قانونی راستہ موجود نہیں تھا۔

بل کے متن کے مطابق کمشنر کو اپیل موصول ہونے کے 15 دن کے اندر فیصلہ دینا ہوگا۔ڈسٹرکٹ کلیکٹر کی غلطی سے متاثرہ شہریوں کو انصاف ملنے کا نیا موقع ملے گا۔

پلاٹس اور کمرشل پراپرٹی کی منتقلی پر اہم ترین ٹیکس ختم کیے جانے کا امکان

بل میں غیر استعمال شدہ اسٹامپ پیپرز کی ری فنڈ کا نظام بھی تجویز کیا گیا ہے۔اگر شہری دو سال تک اسٹامپ پیپر استعمال نہ کریں، یا ملک سے باہر ہوں، جیل میں ہوں یا اسٹامپ ڈیوٹی ان کے قبضے میں نہ ہو، تو وہ ریفنڈ حاصل کر سکیں گے۔

یہ مجوزہ ترامیم شہریوں کو ریلیف دینے، کرپشن کے امکانات کم کرنے اور اسٹامپ ڈیوٹی نظام میں شفافیت لانے کی کوششوں کا حصہ قرار دی جا رہی ہیں۔