Aaj News

پیر, مئ 05, 2025  
07 Dhul-Qadah 1446  

خیبرپختونخوا اور پنجاب میں موسلا دھار بارش سے تباہی، ندی نالے بپھر گئے، جانی و مالی نقصان

دیر لوئر میں موسلادھار بارش کے باعث کچے مکانات زمین بوس ہوگئے
شائع 17 اپريل 2025 08:36am

خیبرپختونخوا اور پنجاب کے مختلف علاقوں میں شدید موسلادھار بارش نے نظامِ زندگی کو درہم برہم کردیا۔ خیبرپختونخوا میں گرج چمک کے ساتھ طوفانی بارشوں نے ندی نالوں میں طغیانی پیدا کردی۔ خیبر اور تھاکوٹ بازار سمیت کئی علاقوں میں سڑکیں دریا کا منظر پیش کرنے لگیں۔

لنڈی کوتل اور گرد و نواح میں پہلے تیز آندھی، پھر ژالہ باری نے شہریوں کو خوفزدہ کردیا۔ پاک افغان شاہراہ پر سیلابی ریلے بہنے لگے، جب کہ لنڈی کوتل بازار میں تیز ریلہ ایک گاڑی کو بہا کر لے گیا۔ تخت بھائی میں گھنے بادل چھا گئے اور دن میں ہی رات کا منظر پیدا ہوگیا۔

دیر لوئر میں موسلادھار بارش کے باعث کچے مکانات زمین بوس ہوگئے، جب کہ کوہاٹ میں ہزاروں ایکڑ پر کھڑی گندم کی فصل مکمل طور پر تباہ ہوگئی۔ مری اور گلیات میں بھی تیز آندھی اور شدید بارش نے تباہی مچائی۔

پنجاب میں بھی صورتحال تشویشناک رہی۔ جہلم کے قریب سوہاوہ میں ایک گھر کی دیوار ٹریکٹر ٹرالی پر آگری، جس کے نتیجے میں ٹرالی پر سوار دو افراد موقع پر ہی جاں بحق ہوگئے، جب کہ دو شدید زخمی ہوئے۔

صوبے کے مختلف علاقوں میں کئی فیڈرز ٹرپ ہوگئے، جس سے بجلی کی فراہمی متاثر ہوئی۔ لاہور میں اگرچہ ہلکی بوندا باندی ہوئی، تاہم اس سے موسم خوشگوار ہوگیا اور گرمی کا زور ٹوٹ گیا۔

محکمہ موسمیات نے آئندہ 24 گھنٹوں کے دوران مزید بارش کی پیشگوئی کی ہے، جب کہ ندی نالوں میں طغیانی کے باعث مزید خطرات لاحق ہیں۔

خیبر پختونخوا

heavy rains

flooding in rivers