سعودی عرب کی وزارت داخلہ نے سعودی ڈیٹا اینڈ آرٹیفیشل انٹیلیجنس اتھارٹی کے اشتراک سے ایک نیا اور جدید ڈیجیٹل پلیٹ فارم متعارف کرایا ہے جسے ’تصریح پلیٹ فارم‘ کہا جاتا ہے۔ یہ پلیٹ فارم حج کے دوران مکہ مکرمہ اور مقدس مقامات میں داخلے کے اجازت نامے جاری کرنے کے لیے قائم کیا گیا ہے۔

تصریح پلیٹ فارم کا مقصد تمام داخلی و خارجی حجاج کرام اور حج کے عملے کو باقاعدہ اجازت نامے جاری کرنا ہے تاکہ وہ مکہ مکرمہ اور مقدس مقامات میں داخل ہو سکیں۔ یہ نظام وزارت حج و عمرہ کے ”نسک“ پلیٹ فارم سے تکنیکی طور پر مربوط ہے، جس سے اجازت ناموں کے اجراء میں شفافیت، تیزی اور سہولت میسر آتی ہے۔

پاکستانی عازمین حج کے لیے بڑی خوشخبری

یہ پلیٹ فارم نہ صرف حجاج کے لیے بلکہ حج کے تمام رضاکاروں، عملے اور ان کی گاڑیوں کے لیے بھی اجازت نامے جاری کرتا ہے۔ ان اجازت ناموں کو قومی ایپلیکیشن ’توکلنا‘ کے ذریعے باآسانی دیکھا جا سکتا ہے۔

تصریح پلیٹ فارم کی ایک اہم خصوصیت یہ ہے کہ یہ مکہ مکرمہ کے داخلی راستوں پر موجود سیکیورٹی اداروں کو ’میدان‘ ایپلیکیشن کے ذریعے اجازت ناموں کی خودکار جانچ اور تصدیق کی سہولت دیتا ہے۔ اس سے نہ صرف وقت کی بچت ہوتی ہے بلکہ سیکیورٹی عمل مزید مؤثر ہو جاتا ہے۔

وژن 2030 کی تکمیل کی جانب ایک قدم

یہ پلیٹ فارم سعودی عرب کے وژن 2030 کے تحت ”ضیوف الرحمن پروگرام“ کے اہداف کی تکمیل کا بھی حصہ ہے، جس کا مقصد حجاج کرام کو اعلیٰ معیار کی خدمات فراہم کرنا اور ان کے حج کے تجربے کو مزید آسان و آرام دہ بنانا ہے۔

عازمین کیلئے اچھی خبر، 2025ء کا حج شدید گرمیوں کا آخری حج ہو گا

تصریح پلیٹ فارم جدید ٹیکنالوجی، حکومتی اداروں کے باہمی تعاون، اور حجاج کرام کی خدمت میں بہتری کی ایک بہترین مثال ہے۔ یہ ایک نئی انقلابی پیش رفت ہے جو حج کے نظام کو مزید مربوط، منظم، اور آسان بناتی ہے۔