پاکستان کرکٹ بورڈ (پی سی بی) نے جنوبی افریقی کرکٹر کوربن بوش کے ایک سال تک پاکستان سپر لیگ (پی ایس ایل) کھیلنے پر پابندی عائد کردی، جنوبی افریقی آل راؤنڈر آئندہ برس پی ایس ایل میں حصہ نہیں لے سکیں گے، وہ اس سال معاہدہ کرنے کے باوجود آئی پی ایل میں چلے گئے تھے۔

کوربن بوش نے پاکستان سپر لیگ کے ساتھ معاہدے کی خلاف ورزی کی تھی، انہوں نے معاہدے کے باوجود بھی پی ایس ایل کھیلنے سے انکار کیا تھا، کوربن بوش نے پی ایس ایل پر ایک اور لیگ کو ترجیح دی تھی۔

پی سی بی کے مطابق کوربن بوش پاکستان سپر لیگ کا اگلا ایڈیشن کھیلنےکے اہل نہیں ہوں گے۔ جنوبی افریقی آل راؤنڈر پر مالی جرمانہ بھی عائد کیا گیا ہے۔

پاکستان کرکٹ بورڈ نے نان ڈسکلوزر ایگریمنٹ کی وجہ سے جرمانےکی رقم بتانے سے گریز کیا ہے جبکہ آل راؤنڈر کوربن بوش نے پی سی بی کی عائد کردہ سزا اور جرمانہ قبول کرلیا۔

کوربن بوش کا کہنا تھا کہ میں اپنے کیے پر شرمندہ اور پاکستانی فینز سے معذرت خواہ ہوں، پشاور زلمی کے فینز کو مایوس کرنے پر معافی مانگتا ہوں، ایچ بی ایل پی ایس ایل ایک پر وقار ٹورنامنٹ ہے اور میرے عمل کے سبب ہونے والی مایوسی کو میں مکمل طور پر سمجھتا ہوں۔ میں پشاور زلمی کے مداحوں کو مایوس کرنے پر معذرت خواہ ہوں۔

ان کا مزید کہنا تھا میں اپنے عمل کی مکمل ذمہ داری لیتا ہوں اور نتائج کو قبول کرتا ہوں جس میں جرمانہ اور ایچ بی ایل پی ایس ایل میں ایک سال کی پابندی شامل ہے۔

واضح رہے 13 جنوری کو لاہور میں ہونے والے ایچ بی ایل پی ایس ایل ڈرافٹ میں 30 سالہ کوربن بوش کا انتخاب پشاور زلمی نے ڈائمنڈ کیٹیگری میں کیا تھا۔

آل راؤنڈر کو ایک سال کی پابندی کا سامنا ہوگا اور وہ آئندہ برس کے ایڈیشن میں حصہ نہیں لے سکیں گے۔