پنجاب کے ضلع منڈی بہاؤالدین میں خالہ نے فائرنگ کرکے بھانجی کو قتل کردیا، ساتویں جماعت کی طالبہ 11 سالہ آمنہ اسکول سے گھرآئی تھی، پولیس نے ملزمہ کو گرفتارکرکے تفتیش شروع کردی۔

پنجاب کے ضلع منڈی بہاؤالدین میں دل دہلا دینے والا واقعہ پیش آیا جہاں خالہ نے مبینہ طور پر فائرنگ کرکے اپنی 11 سالہ بھانجی کو موت کے گھاٹ اتار دیا، 7 ویں جماعت کی طالبہ آمنہ اسکول سے گھر واپس آئی تھی کہ یہ افسوسناک واقعہ پیش آیا۔

پولیس کے مطابق واقعہ تھانہ صدر کی حدود میں واقع علاقے کوٹہڑہ میں پیش آیا، جہاں ملزمہ نے گھر میں موجود لوڈڈ بندوق سے فائرنگ کی۔

مقتولہ کی والدہ کا کہنا ہے کہ اُن کا شوہر کچھ عرصہ قبل وفات پا چکا تھا، جس کے بعد وہ اپنے بچوں سمیت میکے میں مقیم تھیں، ان کے بقول آمنہ اُن کی سب سے بڑی بیٹی تھی جبکہ 2 چھوٹے بیٹے بھی ہیں۔

پولیس نے جائے وقوعہ پر پہنچ کر ملزمہ کو حراست میں لے لیا ہے اور تفتیش کا آغاز کر دیا ہے۔ ابتدائی تفتیش میں پولیس کا کہنا ہے کہ ملزمہ کا ذہنی توازن مکمل طور پر درست نہیں لگتا، جس کے باعث واقعہ کئی پہلوؤں سے مشکوک ہو گیا ہے۔

ذرائع کے مطابق گھر میں لوڈڈ بندوق کی موجودگی اور ملزمہ کی ذہنی کیفیت معاملے کو مزید پیچیدہ بنا رہی ہے، جس کی مکمل چھان بین جاری ہے۔

پولیس کا کہنا ہے کہ پوسٹ مارٹم اور فرانزک رپورٹس کے بعد اصل محرکات سامنے آئیں گے۔ پولیس نے معاملے کو سنجیدگی سے لیتے ہوئے شواہد اکٹھے کر لیے ہیں جبکہ ملزمہ سے تفتیش کا عمل جاری ہے۔