اسرائیلی فوج کی تازہ بمباری کے نتیجے میں مزید 17 فلسطینی شہید ہوگئے، جبکہ غزہ کے مختلف علاقوں میں فضائی اور زمینی حملے جاری ہیں۔

غیر ملکیی زرائع ابلاغ کے مطابق غزہ پر اسرائیلی حملوں میں مزید 17 فلسطینی شہید ہوگے ہیں۔

غیر ملکی میڈیا کے مطابق اسرائیلی فوج نے بدھ کی صبح جنوبی رفح سمیت غزہ کے مختلف علاقوں کو نشانہ بنایا، جس کے نتیجے میں شہادتوں میں مزید اضافہ ہوا ہے۔

اسرائیلی میڈیا کا کہنا ہے کہ فوج نے رفح میں زمینی کارروائیوں کا دائرہ مزید وسیع کر دیا ہے، جس سے مزید جانی نقصان کا خدشہ بڑھ گیا ہے۔

گزشتہ روز بھی غزہ کی وزارت صحت نے 24 گھنٹوں میں 41 فلسطینیوں کی شہادت کی تصدیق کی تھی، جبکہ 18 مارچ سے شروع ہونے والی تازہ اسرائیلی بمباری میں اب تک ایک ہزار سے زائد فلسطینی شہید ہو چکے ہیں۔

غزہ میں جاری اسرائیلی حملوں کے نتیجے میں اکتوبر 2023 سے اب تک شہید ہونے والے فلسطینیوں کی تعداد 50 ہزار 400 سے تجاوز کر گئی ہے، جبکہ لاکھوں افراد بے گھر ہو چکے ہیں۔