ہالی وڈ میں جہاں کامیابی کا جشن منایا جاتا ہے، وہیں بعض مواقع ایسے بھی آتے ہیں جو شدید بحث و مباحثے کو جنم دیتے ہیں۔ ایسا ہی ایک طوفان اٹھ کھڑا ہوا جب مشہوراسرائیلی اداکارہ گیل گیڈوٹ کو ہالی وڈ کے معروف واک آف فیم میں شامل کیا گیا۔ یہ اعلان نہ صرف ان کے مداحوں کے لیے خوشی کا باعث بنا بلکہ اس نے بین الاقوامی سطح پر ایک نئے تنازع کو بھی جنم دیا۔

تقریب میں ہنگامہ آرائی اور احتجاج

گیل گیڈوٹ کی ستارہ کشائی کی تقریب ہالی وڈ کے ایل کیپیٹن تھیٹر کے قریب منعقد ہوئی، لیکن یہ تقریب ایک عام ایونٹ ثابت نہ ہوئی۔ جیسے ہی یہ خبر عام ہوئی، فلسطین کے حامی مظاہرین موقع پر پہنچ گئے اور سخت احتجاج کیا۔ مظاہرین نے ’آزادی‘ اور ’انصاف‘ کے حق میں نعرے لگائے، جبکہ ان کے ہاتھوں میں پلے کارڈز تھے جن پر ’فلسطینیوں کی طرح لڑو‘ اور ’لانگ لِیو پیلسٹائن‘ جیسے نعرے درج تھے۔

یہ احتجاج ایک ایسے وقت میں ہوا جب غزہ میں شدید بمباری جاری تھی، جس سے مظاہرین کے جذبات مزید بھڑک اٹھے۔ احتجاج کی شدت کے باعث تقریب 15 منٹ تاخیر کا شکار ہوئی، جبکہ موقع پر موجود پولیس کو مظاہرین کو قابو میں رکھنے کے لیے متحرک ہونا پڑا۔

بالی ووڈ اور ہالی ووڈ کا معروف اداکار دین اسلام کی دعوت سے منسلک کیسے ہوا؟

اسرائیل کے حامی بھی میدان میں

دلچسپ بات یہ رہی کہ جہاں فلسطین کے حامی مظاہرین موجود تھے، وہیں اسرائیل کے حمایتی بھی اس تقریب میں اپنی آواز بلند کرنے پہنچ گئے۔ ان کے ہاتھوں میں اسرائیلی پرچم تھے اور وہ گیل گیڈوٹ کی حمایت میں نعرے لگا رہے تھے۔ اس موقع پر دونوں گروہوں میں شدید کشیدگی دیکھی گئی اور کچھ مقامات پر تلخ کلامی بھی ہوئی۔ ایک موقع پر جب ایک فلسطینی حامی نے اسرائیلی جھنڈا چھیننے کی کوشش کی تو ماحول مزید کشیدہ ہوگیا، جس کے بعد پولیس نے متعدد افراد کو نظربند کر دیا۔

گیل گیڈوٹ اور تنازع کی جڑیں

یہ پہلی بار نہیں کہ گیل گیڈوٹ کسی تنازع میں گھری ہوں۔ وہ نہ صرف ایک معروف اداکارہ ہیں بلکہ اسرائیلی فوج میں خدمات انجام دے چکی ہیں، جو انہیں فلسطین کے حامیوں کی تنقید کا نشانہ بناتی ہے۔ 7 اکتوبر 2023 کو اسرائیل اور حماس کے درمیان ہونے والی کشیدگی کے بعد، وہ اسرائیلی موقف کی کھل کر حمایت کرتی رہی ہیں۔

مزید برآں، وہ مختلف فورمز پر اسرائیلی مغویوں کی رہائی کے لیے آواز بلند کر چکی ہیں، جس کے باعث انہیں ایک متنازعہ شخصیت کے طور پر دیکھا جاتا ہے۔

ہالی ووڈ اسٹار ٹام کروز اور اینا ڈی آرمس کے درمیان تعلقات کی افواہیں زور پکڑ گئیں

گیل گیڈوٹ کی آنے والی فلم سنو وائٹ 21 مارچ کو ریلیز ہونے جا رہی ہے، اور امکان ہے کہ اس تنازع کے اثرات اس فلم پر بھی پڑ سکتے ہیں۔ کئی حلقے یہ سوال اٹھا رہے ہیں کہ کیا ان کا سیاسی مؤقف ان کے فنی کیریئر پر اثر ڈالے گا؟ یا کیا وہ اپنے مداحوں کی حمایت برقرار رکھ پائیں گی؟

یہ معاملہ صرف ایک تقریب تک محدود نہیں بلکہ عالمی سیاست اور مشرق وسطیٰ کی پیچیدہ صورتحال کی عکاسی بھی کرتا ہے۔ ہالی وڈ میں اکثر ستارے سیاسی تنازعات سے دور رہنے کی کوشش کرتے ہیں، لیکن گیل گیڈوٹ کی موجودگی اور ان کی سرگرمیوں نے انہیں ایک الگ مقام پر لاکھڑا کیا ہے، جہاں ان کی ہر حرکت کو سیاسی عینک سے دیکھا جاتا ہے۔

یہ تنازع ایک بار پھر یہ ثابت کرتا ہے کہ مشہور شخصیات کے فیصلے اور بیانات محض ان کے ذاتی معاملات نہیں ہوتے، بلکہ وہ بین الاقوامی سیاست کے دھارے میں بھی ایک خاص اہمیت رکھتے ہیں۔