لاہور میں ڈالہ کلچر ختم نہ ہوسکا، مسلح گارڈز نے کار سوار شہری کو بیچ سڑک پر تشدد کا نشانہ بنا ڈالا۔ 4 ملزمان کو گرفتار کرلیا گیا ہے۔

لاہورمیں ڈالہ کلچرختم نہ ہوسکا۔ مغلپورہ میں بیجنگ انڈر پاس پر مسلح گارڈز نے کار سوار شہری کو بیچ سڑک پر تشدد کا نشانہ بنا ڈالا۔ کپڑے کا تاجرراہ چلتے چلتے بگڑے شہزادے کے سامنے آ گیا۔ پہلے کار پر گولی چلائی، پھرسوارپرٹوٹ پڑے۔

عینی شاہدین نے بتایا ڈولفن اہلکاروں نے ملزمان کو فرارکرایا۔ واقعے کی فوٹیج وائرل ہوئی تو ڈی آئی جی آپریشنز نے نوٹس لے لیا۔

ملزمان اورسیکیورٹی کمپنی کےخلاف انسداد دہشت گردی ایکٹ کے تحت مقدمہ درج کرنے کا حکم دے دیا۔

گاڑی کے مالک کےخلاف بھی کارروائی کا آغاز کر دیا گیا۔ پولیس کے مطابق چار ملزمان کو گرفتار کرلیا گیا ہے دیگر ملزمان کو بھی جلد گرفتار کرلیا جائے گا۔

ڈی آئی جی آپریشنز کا کہنا ہے کہ ملزمان کی گرفتاری کے لیے سیف سٹی کیمروں کی مدد لی جا رہی ہے۔ محکمہ داخلہ پنجاب نےسکیورٹی کمپنی کے دفاترعارضی طور پر سیل کر دیےگئے ہیں اورنجی سکیورٹی کمپنی کو شوکاز نوٹس بھی جاری کر دیا گیا ہے۔

شوکازکے متن میں کہا گیا ہے کہ سیکیورٹی کمپنی پر پرائیویٹ سیکیورٹی کمپنیز ایکٹ ضابطے کی پابندی لازم تھی۔کمپنی کسی کو گارڈ نہیں رکھ سکتی جو ذہنی یا جسمانی طورپر موزوں نہ ہو۔ کمپنی 30 یوم میں شوکازنوٹس کا تحریری جواب جمع کروانےکی پابند ہے۔

غیر تسلی بخش جواب پرسکیورٹی کمپنی کا لائسنس منسوخ ہوگا۔سکیورٹی کمپنی کےچیف ایگزیکٹو کوسوموار کو پرسنل ہیرنگ کیلئےبھی بلا لیا گیا۔

کار سوار شہری کا ویڈیو بیان سامنے آگیا

مسلح گارڈز کے تشدد کا نشانہ بننے والے شہری عمران کا ویڈیو بیان سامنے آیا جس میں انہوں نے تفصیلات بتائیں۔ شہری نے بتایا کہ وہ رائیونڈ روڈ سے آرہے تھے اور کنال روڈ سے سیدھا کپڑوں کی خریداری کرنے جا رہے تھے کہ کچھ لوگ ڈالہ میں آئے اور انہوں نے مجھے ایک پل کے نیچے روک کر فائرنگ کی جس کے بعد میں اپنی گاڑی سے باہر آیا تو گارڈ نے میری طرف بندوق کر کے ڈرانے کی کوشش کی۔

متاثرہ شخص کا کہنا ہے کہ وہاں موجود لوگوں نے ویڈیوز بنانی شروع کردیں اور مسلح گارڈز اپنی ڈالہ اور تین بندوق چھوڑ کر وہاں سے فرار ہوگئے۔ متاثرہ شہری کا یہ بھی کہنا تھا کہ وہ کپڑے کا تاجر ہے، انہیں غصہ تھا کہ فوری راستہ کیوں نہیں دیا گیا۔

مسلح گارڈز کیخلاف اقدام قتل کا مقدمہ درج

مغلپورہ میں کار سوار شہری پر تشدد اور فائرنگ کے واقعہ کے بعد متاثرہ شہری عمران کی مدعیت میں مقدمہ درج کرلیا گیا۔

متن میں مقدمہ اقدام قتل کی دفعات کے تحت درج کیا گیا۔ ایف آئی آر کے مطابق بیجنگ انڈر پاس میں مسلح افراد نے شہری پر سیدھے فائر کر دئے، مسلح گارڈز نے پہلے کار سوار پر فائر کئے پھر تشدد کرتے رہے۔

ایف آئی آر کے مطابق فائرنگ سے علاقے سے خوف و ہراس پھیل گیا، چار ملزمان کو گرفتار کر لیا گیا تھا، واقعہ میں ملوث پولیس اہلکاراور بقایا ملزمان کی تلاش جاری ہے، ملزمان کو آج کینٹ کچہری میں پیش کیا جائے گا۔