کراچی میں رینجرز اور سی ٹی ڈی پولیس نے انٹیلی جنس اطلاعات کی بنیاد پر کامیاب مشترکہ کارروائی کرتے ہوئے کالعدم تنظیم بلوچ لبریشن فرنٹ (بی ایل ایف) کے دہشت گرد عبدالرحمان کو گرفتار کرلیا۔

ترجمان رینجرز کے مطابق، ماڑی پور کے علاقے سے گرفتار کیے گئے ملزم عبدالرحمان عرف عبداللہ عرف چارلی کے قبضے سے اسلحہ اور ایمونیشن برآمد کر لیا گیا۔ ملزم ماڑی پور کے 500 کوارٹرز کا رہائشی ہے اور 2022 میں کالعدم تنظیم میں شامل ہوا تھا۔

ترجمان کے مطابق، ملزم عبدالرحمان نے کالعدم تنظیم کے رہنما جمعہ خان کی ہدایات پر شہری آفتاب کو قتل کیا تھا۔ اس کے علاوہ، وہ قانون نافذ کرنے والے اداروں کے اہلکاروں کا ڈیٹا اکٹھا کرکے جمعہ خان کو فراہم کرتا رہا۔

ملزم کو مزید تفتیش کے لیے متعلقہ اداروں کے حوالے کر دیا گیا ہے۔