قومی اسمبلی میں قائد حزب اختلاف عمرایوب کا کہنا ہے کہ اپوزیشن الائنس میں موجود تمام پارٹیاں ایک پیج پرآرہی ہیں، اپوزیشن کا ایک ہی ہدف ہے کہ ملک میں آئین و قانون کی بالادستی ہونی چاہیئے، زرداری اور بلاول بھٹو سندھ کے عوام کے ساتھ دھوکا کرنے جا رہے ہیں، یہ لوگ سندھ کا پانی بیچنے جا رہے ہیں، پیکا ایکٹ پر بلاول مگر مچھ کے آنسو رو رہا ہے یہ خود اس میں ملوث تھا، شہباز شریف ہر وقت بوٹ پالش کے چکر میں ہوتا ہے۔

اسلام آباد کی انسدادِ دہشت گردی عدالت کے باہر میڈیا سے گفتگو کرتے ہوئے پی ٹی آئی رہنما عمر ایوب نے کہا کہ اپوزیشن الائنس میں موجود تمام پارٹیاں ایک پیج پر آرہی ہیں، اپوزیشن کی سیاسی پارٹیوں کا ایک ہی ہدف ہے کہ ملک میں آئین و قانون کی بالادستی ہونی چاہیئے۔

عمر ایوب نے کہا کہ عدالتیں فیصلے میرٹ پر کریں گی، ملک میں خوشحالی آئے گی، اشیائے خور و نوش کی قیمتیں آسمان سے باتیں کر رہی ہیں، بجلی و گیس کی قیمتوں میں بہت زیادہ اضافہ ہو چکا ہے، ملک میں کاروبار سکڑ چکا ہے۔

پی ٹی آئی رہنما کا کہنا تھا کہ ملک میں دہشت گردی بڑھ رہی ہے، انٹیلی جنس ایجنسیز کا جو کام ہے وہ نہیں کر رہیں، ہمارے نوجوان سپاہی اور افسران شہید ہو رہے ہیں، پاکستان میں تقریباً 13 انٹیلی جنس ایجنسیز موجود ہیں، ان ایجنسیز کے تمام لوگوں کا ایک ہی مقصد پی ٹی آئی کے لوگوں کے خلاف کیسز بنانا ہے، جہاں دہشت گردی ہو رہی ہے وہاں انٹیلی جنس ایجنسیز کے لوگوں کا کورٹ مارشل ہونا چاہیئے۔

حکمرانوں نے ہماری جدوجہد کو روکنے کی بار بارکوشش کی، عمر ایوب

جس دن ہماری حکومت آئے گی 26 ویں آئینی ترمیم واپس کریں گے، عمر ایوب

جوڈیشل کمپلیکس میانوالی حملہ کیس: عمر ایوب و دیگر پی ٹی آئی رہنماؤں پر فرد جرم عائد

انہوں نے مزید کہا کہ آصف زرداری اور بلاول بھٹو سندھ کے عوام کے ساتھ دھوکا کرنے جا رہے ہیں، یہ لوگ سندھ کا پانی بیچنے جا رہے ہیں، پیکا ایکٹ پر بلاول مگر مچھ کے آنسو رو رہا ہے یہ خود اس میں ملوث تھا، شہباز شریف ہر وقت بوٹ پالش کے چکر میں ہوتا ہے۔

عمر ایوب کی 2 مقدمات میں ضمانت قبل از گرفتاری کی درخواستیں منظور

قبل ازیں انسدادِ دہشت گردی عدالت اسلام آباد نے قومی اسمبلی میں اپوزیشن لیڈر عمر ایوب کی 2 مقدمات میں ضمانت قبل از گرفتاری کی درخواستیں منظور کرلیں۔

انسدادِ دہشتگردی عدالت اسلام آباد میں اپوزیشن لیڈرعمرایوب پر سنگجانی جلسے پر درج 2 مقدمات میں ضمانت قبل از گرفتاری کی درخواستوں پر سماعت ہوئی، سماعت انسداد دہشت گری عدالت نمبر ایک کے ڈیوٹی جج طاہرعباس سِپرا نے کی۔ عمر ایوب اپنے وکلا کے ہمراہ انسدادِ دہشت گردی عدالت میں پیش ہوئے۔

عدالت نے عمر ایوب کی 2 مقدمات میں ضمانت قبل از گرفتاری کی درخواست منظور کرلی جبکہ عمر ایوب کی ضمانتیں 5،5 ہزار روپے کے مچلکوں کے عوض منظور کی گئیں۔