امریکی صدر ڈونلڈ ٹرمپ نے کانگریس کے مشترکہ اجلاس سے اپنے پہلے خطاب کے دوران ایک جذباتی لمحے میں ٹیکساس کے 13 سالہ ڈی جے ڈینیئل کو اعزازی سیکرٹ سروس ایجنٹ بنانے کا اعلان کر دیا۔

ڈی جے ڈینیئل، جو کئی سالوں سے کینسر سے لڑ رہا ہے، کانگریس کی گیلری میں موجود تھا جب صدر ٹرمپ نے اس کی کہانی قوم کے سامنے بیان کی۔

ٹرمپ نے بتایا کہ 2018 میں ڈی جے کو ایک نایاب قسم کے کینسر کی تشخیص ہوئی تھی، اور ڈاکٹرز نے اسے صرف پانچ ماہ کی زندگی کی پیش گوئی کی تھی۔ لیکن تمام مشکلات کے باوجود، اس بہادر بچے نے نہ صرف زندگی کے لیے جنگ لڑی بلکہ پولیس آفیسر بننے کا اپنا خواب بھی کبھی نہیں چھوڑا۔

’مسک چور ہے‘، ٹرمپ کے کانگریس خطاب کے دوران اپوزیشن کا شدید احتجاج

صدر ٹرمپ نے جذباتی انداز میں اعلان کیا، ’آج رات، ڈی جے، ہم تمہیں سب سے بڑا اعزاز دینے جا رہے ہیں۔ میں ہمارے نئے سیکرٹ سروس ڈائریکٹر، شان کرن سے کہہ رہا ہوں کہ وہ تمہیں باضابطہ طور پر امریکا کا سیکرٹ سروس ایجنٹ مقرر کریں۔‘

صدر کے اعلان پر پورے ایوان میں تالیاں گونج اٹھیں، قانون ساز اپنی نشستوں سے کھڑے ہو کر ڈی جے کے حق میں نعرے لگانے لگے۔

اس دوران سیکرٹ سروس ڈائریکٹر شان کرن نے خود گیلری میں جا کر ڈی جے کو اس کے سرکاری اسناد دیے۔

خوشی سے مغلوب ہو کر، ڈی جے نے کرن کو گلے لگا لیا، اور یہ منظر ایوان میں موجود ہر شخص کے لیے ایک یادگار لمحہ بن گیا۔