انسداد دہشت گردی عدالت لاہور نے جناح ہاؤس کے قریب پولیس کی گاڑیاں جلانے کے تین مقدمات میں تحریک انصاف کے رہنماؤں پر ترمیمی فرد جرم عائد کر دی۔ جبکہ اسلام آباد کی ضلعی عدالت نے بیرسٹر گوہر، عمر ایوب و دیگر کے وارنٹ گرفتاری جاری کردئے۔

لاہور کی انسداد دہشت گردی عدالت کے جج منظر علی گل نے کوٹ لکھپت جیل میں کیس کی سماعت کی، جہاں شاہ محمود قریشی، عمر سرفراز چیمہ، ڈاکٹر یاسمین راشد سمیت دیگر ملزمان کو پیش کیا گیا۔

ملزمان نے فرد جرم کی صحت سے انکار کیا، جس کے بعد عدالت نے تینوں مقدمات میں ترمیمی فرد جرم عائد کر دی۔

عدلیہ حمزہ، صنم جاوید اور خدیجہ شاہ سمیت دیگر ملزمان بھی عدالت میں پیش ہوئے، جبکہ عدالت نے 6 مارچ کو گواہوں کو بیان ریکارڈ کرانے کے لیے طلب کر لیا۔

پراسیکیوشن کی درخواست پر عدالت نے فرد جرم میں ترمیم کی اجازت دی، جبکہ پی ٹی آئی رہنماؤں اور کارکنوں پر بغاوت اور فسادات پر اکسانے کے الزامات عائد کیے گئے ہیں۔

اسلام آباد: بیرسٹر گوہر، عمر ایوب و دیگر کے وارنٹ گرفتاری جاری

دوسری جانب ڈسٹرکٹ اینڈ سیشن کورٹ اسلام آباد میں بیرسٹر گوہر، عمر ایوب اور دیگر کے خلاف دفعہ 144 کی خلاف ورزی کے کیس کی سماعت ہوئی۔

جوڈیشل مجسٹریٹ شہزاد خان نے کیسز کی سماعت کی، جہاں عمر ایوب، عامر ڈوگر اور عامر مغل کی عدم حاضری پر وارنٹ گرفتاری جاری کر دیے گئے۔

عدالت نے بیرسٹر گوہر اور شعیب شاہین کی حاضری سے استثنیٰ کی درخواست منظور کر لی، جبکہ ملزمان کی بریت کی درخواستوں پر آج بھی دلائل نہ ہو سکے۔

عدالت نے کیس کی سماعت 23 اپریل تک ملتوی کر دی۔ بیرسٹر گوہر و دیگر کے خلاف تھانہ آئی-9 میں دو مقدمات درج ہیں۔