ملک بھر کی عدالتوں میں زیر التوا ٹیکس مقدمات کے باعث اربوں روپے کے ریونیو کی وصولی مشکلات کا شکار ہے۔ سپریم کورٹ کی جانب سے ٹیکس مقدمات کے حل کے لیے قائم کردہ کمیٹی کی سفارشات منظر عام پر آ گئی ہیں۔

چیف جسٹس یحییٰ آفریدی کی زیر صدارت 7 نومبر 2024 کو ہونے والے اجلاس میں انکشاف کیا گیا کہ ملک کی اعلیٰ عدالتوں میں 1 لاکھ 8 ہزار 366 مقدمات زیر التوا ہیں، جن میں 4457 ارب روپے کی رقم شامل ہے۔

اجلاس میں مزید بتایا گیا کہ سپریم کورٹ میں تقریباً 6 ہزار ٹیکس ریونیو کے مقدمات زیر التوا ہیں، جبکہ تقریباً 2 ہزار مقدمات مختلف ٹربیونلز اور عدالتوں میں زیر سماعت ہیں، جن میں حکم امتناع جاری کیا جا چکا ہے۔

سپریم کورٹ کی کمیٹی نے سفارش کی ہے کہ سپریم کورٹ میں ایک اے ڈی آر (متبادل تنازعات کے حل) یونٹ قائم کیا جائے تاکہ ٹیکس مقدمات کو جلد از جلد نمٹایا جا سکے۔

کمیٹی نے مزید تجویز دی کہ ایف بی آر اور دیگر ریاستی اداروں کے اے ڈی آر نظام کی نگرانی کی جائے اور سپریم کورٹ سمیت تمام ہائی کورٹس میں اے ڈی آر سیل قائم کیے جائیں تاکہ ٹیکس معاملات میں تاخیر کو کم کیا جا سکے اور ریونیو کی بروقت وصولی ممکن ہو۔