آئی سی سی چیمپئنز ٹرافی میں کالے جادو کی مدد سے بھارت کی جیت کا دعویٰ مذاق بن گیا، پاکستانی ٹی وی چینل نے بھارتی کرکٹ ٹیم کی جیت پر عجیب وغریب دعویٰ کرتے ہوئے کہا ہے کہ پاک بھارت میچ کے دوران 22 ہندو پنڈتوں نے کالا جادو کیا۔

پاکستانی نیوز چینل کی ویڈیو اس وقت سوشل میڈیا پر وائرل ہو گئی ہے جس میں ایک پینل یہ بحث کر رہا ہے کہ ان کے ملک کو بھارت کے ہاتھوں شکست کیوں ہوئی، ویڈیو میں پینل کا دعویٰ ہے کہ 22 پنڈتوں نے ’کالا جادو‘ کیا تھا۔

چیمپئنز ٹرافی میں بھارت کے ہاتھوں پاکستان کی شکست نے مداحوں میں ہلچل مچا دی تھی، لیکن معاملہ اس وقت عجیب رخ اختیار کر گیا جب پاکستانی میڈیا کے ایک پروگرام میں شکست کی وجہ ’کالا جادو‘ کو قرار دیا گیا، ویڈیو نے اس وقت سوشل میڈیا پر دھوم مچا رکھی ہے۔

’ڈسکور پاکستان‘ چینل پر نشر ہونے والے پروگرام میں پینل نے دعویٰ کیا کہ بھارت کی فتح کی وجہ پوجا، پرارتھنا، اور جادو ٹونا تھا، جس سے پاکستان کو بھارت نے 6 وکٹوں سے شکست دے دی تھی۔

یادرہے کہ چیمپئنز ٹرافی کے ہائی وولٹیج میچ میں ویرات کوہلی کی شاندار سنچری کی بدولت بھارت نے پاکستان کو 6 وکٹوں سے شکست دے دی تھی۔

242 رنز کا ہدف بھارت نے 43 اوور میں 4 وکٹ کے نقصان پر پورا کرلیا، پاکستانی ٹیم بھارت کے خلاف بڑا اسکور کرنے میں ناکام رہی، پوری ٹیم 241 رنز پر پویلین لوٹ گئی۔

کپتان محمدرضوان اور سعود شکیل کا کسی نے ساتھ نہ دیا۔ رضوان نے 46 جبکہ سعود نے 62 رنز بنائے۔ بابر اعظم اور امام الحق کا بلا ایک بار پھر نہ چلا۔

ہدف کے تعاقب میں بھارتی ٹیم نے شاندار آغاز کیا اور ویرات کوہلی کی زبردست بلے بازی کی بدولت 42 اعشاریہ 3 اوورز میں ہدف حاصل کر لیا تھا۔