گورنر خیبرپختونخوا فیصل کریم کنڈی نے وزیراعلیٰ خیبرپختونخوا علی امین گنڈاپور کو چیلنج کرتے ہوئے کہا ہے کہ اگر انہوں نے سندھ کے وزیراعلیٰ مراد علی شاہ سے ایک انچ بھی زیادہ ترقیاتی کام کیا ہو تو مراد علی شاہ مستعفی ہونے کو تیار ہیں۔ انہوں نے کہا کہ خیبرپختونخوا میں امن و ترقیاتی کاموں کی صورتحال انتہائی مایوس کن ہے، جبکہ سندھ میں بغیر صحت کارڈ کے بھی عوام کو مفت علاج کی سہولت حاصل ہے۔

فیصل کریم کنڈی نے میاں چنوں میں صحافیوں سے گفتگو کرتے ہوئے کہا کہ پاکستان پیپلز پارٹی عوام کی محبوب جماعت ہے اور وہ دن دور نہیں جب بلاول بھٹو زرداری ملک کے وزیراعظم ہوں گے۔ انہوں نے پاکستان تحریک انصاف پر تنقید کرتے ہوئے کہا کہ جو حکومت کروڑوں نوکریاں اور لاکھوں گھر دینے کے وعدے کرتی تھی، اسی نے محض ایک بل کے ذریعے 20 ہزار ملازمتیں ختم کر دیں۔

گورنر خیبرپختونخوا نے جیل میں قیدیوں کے ساتھ امتیازی سلوک پر بھی بات کی اور کہا کہ اڈیالہ جیل میں وائیلیشنز ہو رہی ہیں، لیکن جو سہولیات قیدی نمبر 804 کو مل رہی ہیں، وہ تمام قیدیوں کو بھی دی جانی چاہئیں۔ انہوں نے طنزیہ انداز میں کہا کہ جو شخص امریکہ جا کر فریج اور اے سی اتارنے کی باتیں کرتا تھا، آج وہ خود مشکلات کا شکار ہے۔

فیصل کریم کنڈی نے خیبرپختونخوا میں ترقیاتی منصوبوں پر بھی سوالات اٹھائے اور کہا کہ 2013 میں ایک پرامن صوبہ پی ٹی آئی کے حوالے کیا گیا تھا، لیکن آج صوبے کی حالت سب کے سامنے ہے۔ انہوں نے کہا کہ ارباب نیاز اسٹیڈیم کا نام عمران خان اسٹیڈیم رکھنے سے ترقی نہیں ہوگی، بلکہ ضروری ہے کہ اسے بھی محسن نقوی کے حوالے کر دیا جائے تاکہ یہ جلد مکمل ہو سکے، جیسا کہ پنجاب اور سندھ میں اسٹیڈیمز چند دنوں میں مکمل کیے گئے۔

انہوں نے کہا کہ پنجاب کی عوام نے ہمیشہ پیپلز پارٹی کو محبت دی ہے، اگر یہ محبت جاری رہی تو جلد بلاول بھٹو پاکستان کے وزیراعظم ہوں گے۔ گورنر خیبرپختونخوا نے کہا کہ اگر خیبرپختونخوا اور سندھ کے وزرائے اعلیٰ کا موازنہ کیا جائے تو سندھ میں زیادہ ترقی نظر آتی ہے، لہٰذا جو وزیراعلیٰ کام نہیں کر سکا، اسے مستعفی ہو جانا چاہیے۔