پی ٹی آئی رہنماؤں کی اڈیالہ جیل آمد پربانی سے ملاقات نہیں کرائی گئی، سلمان اکرم راجا نے کہا جیل حکام نے ہمارے ساتھ گیم کی، اندر بلا کرکہا وقت ختم ہوگیا، ہم ایک بجے یہاں آئے تھے۔۔ علیمہ خان کو رکاوٹوں کے باعث دو کلومیٹر پیدل چل کرجیل آنا پڑا اوربانی سے ملاقات کی۔

اڈیالہ جیل کے باہر میڈیا سے گفتگو کرتے ہوئے بیرسٹر سلمان اکرم راجہ نے کہا کہ جیل حکام نے ہمارے ساتھ گیم کی ،ہمیں اندر بلا کرکہا وقت ختم ہوگیا، ہم ایک بجے کے یہاں آئے ہوئے لیکن ملاقات نہیں کرائی گئی۔

پی ٹی آئی کے سیکریٹری جنرل نے کہا کہ اچھی بات یہ ہے بہنوں کی ملاقات ہوئی ہے فیملی کے پانچ ممبران ملے، علیمہ خان نے بتایا بانی کی صحت بلکل ٹھیک ہے، راستے روکنا بچگانہ حرکت ہے یہ سمجھتے ہیں اس طرح بانی پر دباو ڈالا جاسکتا ہے۔

سلمان اکرم راجہ نے کہا کہ انکو لگتا ہے راستے بند کرنے سے ملاقات نہ کرانے سے بانی دباؤ میں آجائینگے، یہ بانی پی ٹی آئی کو نہیں سمجھ سکے وہ کسی دباو میں نہیں آئینگے، بانی مضبوط اعصاب کا مالک ہے وہ کسی قسم کی ڈیل نہیں کرینگے، بانی پی ٹی آئی اپنے اصولوں کے ساتھ کھڑے ہیں۔

انھوں نے کہا کہ بانی آئین و قانون کے مطابق جیل سے باہر آئینگے انکو کوئی آسانی نہیں چاہیئے، بانی کی بہنوں نے جو آج بیان دیا اس سے واضع ہے وہ کسی قسم کی ڈیل نہیں چاہتے، بانی اصول کی بات کرتے ہیں وہ کہتے ہیں فوج ہماری فوج ہے، بانی کا کہنا ہے دہشت گردی کے خلاف سب کو ملکر چلنا چاہیئے۔

سلمان اکرم راجہ نے کہا کہ بانی کے ساتھ جو ہورہا ہے اس پر وہ جسے ذمہ دار ٹھہرائیں گے وہ حق بہ جانب ہے، عوام جن مسائل کا سامنا کررہے ہیں اس پر اپوزیشن جماعتوں سے بات کرتے رہینگے، ہماری اپوزیشن جماعتوں سے اچھی ملاقاتیں رہی ہیں۔

تحریک انصاف کے سیکریٹری جنرل سلمان اکرم راجہ نے کہا ہے کہ ہمارے پاس انسداد دہشت گردی عدالت (اے ٹی سی) کا آرڈر موجود ہے، مگر ہمیں اڈیالہ جیل کے باہر روکا جا رہا ہے، جو نہ صرف توہینِ عدالت ہے بلکہ بنیادی انسانی حقوق کی بھی خلاف ورزی ہے۔

اڈیالہ جیل کے باہر میڈیا سے گفتگو کرتے ہوئے سلمان اکرم راجہ نے کہا کہ ہمیں روکنا قیدی کے حقوق کی صریحاً خلاف ورزی ہے، ہمیں ابھی بتایا گیا ہے کہ آپ یہاں رکیں، جبکہ کوئی بھی کام منصوبہ بندی کے بغیر نہیں کیا جا سکتا۔

انہوں نے مزید کہا کہ اڈیالہ جیل میں جاری ٹرائلز کی لمبی تاریخیں ڈال دی گئی ہیں، جبکہ بانی کے تمام مقدمات دو دن پہلے تعینات کیے گئے ججز کو سونپ دیے گئے، جو ایک منظم منصوبہ بندی کے تحت کیا گیا ہے۔

سلمان اکرم راجہ نے 26ویں آئینی ترمیم کے معاملے پر بات کرتے ہوئے کہا کہ پارٹی پالیسی کے خلاف ووٹ دینے والوں کو نکالنے کا ایک طریقہ موجود ہے اور کچھ اراکین کے جوابات موصول ہو چکے ہیں۔

انہوں نے واضح کیا کہ فواد چوہدری اب پاکستان تحریک انصاف کا حصہ نہیں رہے۔

سلمان اکرم راجہ نے مزید کہا کہ رمضان کے بعد احتجاج کیا جائے گا اور ہم سڑکوں پر ہوں گے۔ انہوں نے اس عزم کا اظہار کیا کہ قانونی جنگ کے ساتھ ساتھ عوامی سطح پر بھی اقدامات کیے جائیں گے تاکہ انصاف کے تقاضے پورے کیے جا سکیں۔