نائب وزیراعظم و وزیر خارجہ سلامتی کونسل اجلاس میں شرکت کے لیے نیو یارک پہنچ گئے۔

ترجمان دفتر خارجہ شفقت علی خان کے مطابق نائب وزیر اعظم اسحاق ڈار نیویارک پہنچ گئے۔ وہ 18 فروری کو طے شدہ ’’کثیر جہتی پر عمل: اصلاحات اور گلوبل گورننس میں بہتری‘‘ کے موضوع پر اقوام متحدہ کی سلامتی کونسل کے اعلیٰ سطح اجلاس میں شرکت کے لیے نیو یارک پہنچے ہیں۔

اسحاق ڈار کا امریکا میں ہوائی اڈے پر اقوام متحدہ میں پاکستان کے مستقل نمائندوں منیر اکرم اور عاصم افتخار احمد نے استقبال کیا۔ اس موقع پر نیویارک میں قونصل جنرل عامر اتوزئی بھی موجود تھے۔

پاکستانی اور چینی وزیر خارجہ کی ملاقات بھی ہوگی، ایونٹ کی صدارت چین کے وزیرخارجہ وانگ یی کریں گے، اہم ممالک کے پانچ وزرائے خارجہ بھی نیویارک پہنچیں گے۔

ترجمان دفتر خارجہ کے مطابق نائب وزیر اعظم اسحاق ڈار کی ہم منصبوں کے ساتھ ساتھ اقوام متحدہ کے سینئر حکام کے ساتھ دو طرفہ ملاقاتیں بھی متوقع ہیں۔