شاہی قلعہ لاہور کے دیوانِ عام میں آئی سی سی چیمپینز ٹرافی 2025 کا رنگا رنگ افتتاحی تقریب کے ساتھ میلہ سج گیا۔ چیئرمین پی سی بی محسن نقوی کہتے ہیں کہ 29 سال بعد آئی سی سی کے ایونٹ کی میزبانی کےلئےتیار ہیں۔ تقریب میں میوزک کےتڑکےاور آتشبازی کے شاندارمظاہرے نے تقریب کو چار چاند لگادئیے۔

لاہورکے شاہی قلعہ کےدیوان عام میں ائی سی سی چیمپینز ٹرافی کی افتتاحی تقریب میں انٹرنیشنل کرکٹ کونسل کے چیف ایکزیکٹیو جیف آلڈرڈائس، پاکستان کرکٹ بورڈ کے اعلیٰ حکام ، حکومتی اور سیاسی شخصیات سمیت سابق کرکٹرز بھی تقریب میں شریک ہوئے۔

چیمپئنزٹرافی2017کی وننگ ٹیم کےکھلاڑیوں کاگروپ فوٹوسیشن

شاہی قلعہ کے دیوانِ عام میں چیمپئینز ٹرافی کی افتتاحی تقریب میں 2017 میں چیمپئنزٹرافی کی فاتح ٹیم کے کھلاڑیوں کی شاہی قلعے آمد ہوئی، وننگ ٹیم کے کھلاڑیوں نے گروپ فوٹو سیشن کیا۔

چیمپئنزٹرافی2017کی وننگ ٹیم کے کھلاڑی وائٹ جیکٹ پہن کرشریک ہوئے۔ سرفرازاحمد، محمدحفیظ، محمدعامر، شاداب خان، اظہرعلی، حارث سہیل، حسن علی اور محمد عامر بھی گروپ فوٹوسیشن میں شریک ہوئے۔

فوٹوسیشن میں چیئرمین پی سی بی محسن نقوی، سابق فاسٹ باؤلرشعیب احمد کے علاوہ آئی جی پنجاب بھی شریک ہوئے۔ افتتاحی تقریب میں اسپیکر پنجاب اسمبلی ملک محمد احمد خان، وزیر کھیل فیصل کھوکھر اور لاہور قلندرز کے عاطف رانا بھی تقریب میں شریک ہیں۔

آئی سی سی کے چیف ایگزیکٹو جیف آلڈرڈائس کا خطاب

آئی سی سی کے چیف ایگزیکٹو جیف آلڈر ڈائس نے کہا کہ چیمپئنزٹرافی پاکستان کے پاس کرکٹ سے اپنے جنون کو دکھانے کا سنہری موقع ہے، میں نے اوول میں پاکستان ٹیم کو چیمپیئنز ٹرافی جیتتے دیکھا ہے۔

جیف آلڈرڈائس نے کہا کہ قذافی اسٹیڈیم اورنیشنل اسٹیڈیم کراچی کو دیکھ کر خوشی ہوئی، اگلے دو ہفتے شائقین کو پاکستان میں بہترین کرکٹ دیکھنے کو ملے گی۔

انھوں نے کہا کہ تمام مہمانوں کوآئی سی سی کی جانب سے خوش آمدید کہتے ہیں، تاریخی لمحے پرآئی سی سی کی نمائندگی کرنا اعزاز ہے، چیئرمین پی سی بی کونئے اسٹیڈیمزتیارکرنے پرمبارکباد دیتا ہوں، کھلاڑیوں اورشائقین کیلئےبہترین سہولیات فراہم کی گئی ہیں

جیف آلڈر ڈائس نے کہا کہ پاکستان کی آئی سی سی ایونٹس کی کامیاب میزبانی کی تاریخ ہے، تمام ٹیموں کیلئے نیک خواہشات ہیں، آئندہ دو ہفتے شائقین کرکٹ کیلئے دلچسپ مقابلوں سے بھرپورہونگے۔

محسن نقوی کا خطاب

لاہور کے شاہی قلعہ میں چیمپئنزٹرافی کی افتتاحی تقریب سے خطاب کرتے ہوئے چئیرمین پی سی بی محسن نقوی نے کہا کہ تمام مہمانوں کو تقریب میں خوش آمدید کہتا ہوں، دیوان عام میں چیمپئنز ٹرافی کی افتتاحی تقریب یاد گارہے۔

محسن نقوی نے کہا کہ پاکستان 29سال بعد آئی سی سی ایونٹ کی میزبانی کررہا ہے، چیمپئنزٹرافی کرکٹرز کو خود کو منوانے کا سنہری موقع ہے۔

چیئرمین پی سی بی نے کہا کہ چیمپئنزٹرافی کیلئے اسٹیڈیمزکوعالمی معیارکا بنایا، اسٹیڈیم کی تیاری میں تمام ورکرز کا مشکور ہوں، یہ ٹورنامنٹ نئی یادیں دے کرجائے گا، دنیا کو دکھانا ہے کہ ہم بہترین میزبان ہیں۔

سرفرازاحمدکی آئن بشپ،ٹم ساؤدھی اورجےپی ڈومنی کےساتھ پینل ڈسکشن

سابق کرکٹرسرفراز احمد نے آئن بشپ، ٹم ساؤدھی اورجے پی ڈومنی کے ساتھ پینل ڈسکشن کرتے ہوئے کہا کہ سب کوخوش آمدید کہتا ہوں، ہمیں اس موقع کی ضرورت تھی، امیدہے پاکستان اس بار بھی چیمپئنزٹرافی جیتے گا۔

سرفرازاحمد نے کہا کہ 2017 کی جیت کوالفاظ میں بیان نہیں کیا جا سکتا، چیمپئنزٹرافی کی جیت کے بعد قوم بہت خوش تھی، ملک کے ہرشہرمیں ہزاروں لوگوں نے ہمارا استقبال کیا، میرے اپنے شہرکراچی کے لوگوں نے بہت عزت دی۔

تقریب میں فنکاروں نےسربکھیر کر ماحول کو گرما دیا، اختتام پر آتش بازی کے شاندار مظاہرے سےآسمان پر رنگ و نور کی برسات ہوگئی۔

کراچی میں بھی ایونٹ کی افتتاحی تقریب 19 فروری کو ہوگی

کراچی میں بھی ایونٹ کی افتتاحی تقریب 19 فروری کو ہوگی۔ چیمپئنز ٹرافی کا آغاز 19 فروری سے کراچی میں پہلے میچ کے ساتھ ہوگا، جس میں پاکستان اور نیوزی لینڈ کی ٹیمیں مدمقابل ہوں گی۔ ایونٹ کا سب سے بڑا مقابلہ 23 فروری کو دبئی میں روایتی حریف پاکستان اور بھارت کے درمیان ہوگا۔

کرکٹ کے وہ بڑے نام جو چیمپئنز ٹرافی کھیلتے نظر نہیں آئیں گے

انیس دن تک جاری رہنے والے اس میگا ایونٹ میں کراچی، لاہور، راولپنڈی اور دبئی کے میدان کرکٹ کے سنسنی خیز مقابلوں کی میزبانی کریں گے، جبکہ ٹورنامنٹ کا فائنل 9 مارچ کو کھیلا جائے گا، اور فاتح ٹیم کو 61 کروڑ روپے سے زائد کی انعامی رقم ملے گی۔

بھارت اور بنگلہ دیش کی ٹیمیں دبئی پہنچ چکی ہیں، جبکہ بنگال ٹائیگرز کل پاکستان شاہینز کے خلاف پریکٹس میچ کھیلیں گے۔

چیمپئنز ٹرافی 2025 کے میچز لائیو کیسے دیکھیں؟

افغانستان اور نیوزی لینڈ کی ٹیمیں آج کراچی میں وارم اپ میچ میں آمنے سامنے ہوں گی۔ آسٹریلوی ٹیم 17 فروری اور انگلینڈ کی ٹیم 18 فروری کو لاہور پہنچے گی۔