امریکی صدر ڈونلڈ ٹرمپ نے پاکستان کے بارے میں تنقیدی خیالات رکھنے والے بھارتی نژاد اسکالر ایس پال کپور کو جنوبی اور وسطی ایشیا کے لیے معاون وزیر خارجہ نامزد کیا ہے۔

عالمی میڈیا کے مطابق امریکی صدر ڈونلڈ ٹرمپ نے جنوبی اور وسطی ایشیا کے لیے اپنا معاون وزیر خارجہ بنانے کے لیے بھارتی نژاد اسکالر ایس پال کپور کو نامزد کردیا ہے، جو پاکستان سے متعلق سخت گیر موقف رکھنے کے لیے جانے جاتے ہیں۔

یہ تقرری ایک ایسے وقت میں کی گئی ہے جب بھارتی وزیر اعظم نریندر مودی واشنگٹن کے سرکاری دورے پر ہیں، جس کے باعث یہ اقدام امریکا کی جنوبی ایشیا سے متعلق پالیسی میں ممکنہ تبدیلی کا اشارہ دیتا ہے۔ تجزیہ کاروں کے مطابق، اس تقرری سے پاکستان سے متعلق امریکی رویے میں مزید سختی پیدا ہو سکتی ہے۔

ٹرمپ نے روئٹرز، نیویارک ٹائمز سمیت دیگر میڈیا اداروں سے لاکھوں ڈالر واپسی کا مطالبہ کردیا

عدالت نے ڈونلڈ ٹرمپ کو ہش منی کیس میں مجرم قرار دے دیا

جنوبی ایشیائی امور پر گہری نظر رکھنے والے ماہرین کا کہنا ہے کہ ایس پال کپور بھی امریکی انتظامیہ میں شامل دیگر عہدیداروں کی طرح بھارت کے ساتھ قریبی تعلقات کے حامی اور پاکستان پر تنقید کرنے والے رہ چکے ہیں۔

اگر امریکی سینیٹ ان کی نامزدگی کی توثیق کر دیتی ہے تو وہ ڈونلڈ لو کی جگہ سنبھالیں گے، جب کہ فی الحال ایرک میئر جنوبی اور وسطی ایشیا کے سینئر عہدیدار کے طور پر خدمات انجام دے رہے ہیں۔

یہ پہلا موقع نہیں جب ڈونلڈ ٹرمپ نے کسی بھارتی نژاد شخصیت کو اعلیٰ امریکی عہدے کے لیے منتخب کیا ہو، ماضی میں بھی وہ کئی بھارتی نژاد شہریوں کو اہم حکومتی مناصب پر تعینات کر چکے ہیں۔