سندھ کے سینئر وزیر شرجیل انعام میمن کا کہنا ہے کہ انفلوئنزا کی بیماری پاکستان سمیت دنیا بھر میں پھیل رہی ہے، اس سے بچاؤ کے لیے عوام کو احتیاطی تدابیر اختیار کرنی چاہئیں۔

ہفتے کے روز پریس کانفرنس کرتے ہوئے شرجیل میمن نے کہا کہ جس طرح کورونا وبا کے دوران سماجی فاصلہ رکھا جاتا تھا، اسی طرح اب بھی شہریوں کو ایک دوسرے سے مناسب فاصلہ رکھنا چاہیے اور ماسک پہننے کی عادت اپنانی چاہیے تاکہ بیماری کے پھیلاؤ کو روکا جا سکے۔

دوسری جانب، محکمہ صحت سندھ نے ایچ ون این ون وائرس سے متعلق ایڈوائزری جاری کر دی ہے۔

ایڈوائزری کے مطابق، کراچی سمیت صوبے کے مختلف اضلاع میں سرویلنس بڑھانے کی ہدایت کی گئی ہے جبکہ تمام اسپتالوں کو مشتبہ اور تصدیق شدہ کیسز کی صورت میں فوری اطلاع دینے کے احکامات جاری کیے گئے ہیں۔

محکمہ صحت کی ایڈوائزری میں کہا گیا ہے کہ سرکاری اسپتالوں میں عملے کے لیے حفاظتی ساز و سامان (پی پی ایز) کی فراہمی یقینی بنائی جائے اور تمام اسپتال ہفتہ وار رپورٹ جمع کرائیں تاکہ وبا کی صورتحال پر قابو پایا جا سکے۔