قومی اسمبلی نے اراکین پارلیمنٹ کی تنخواہوں اور الاؤنسز میں اضافے کے ردو بدل کا اختیار فنانس کمیٹیوں کو دینے کا بل کثرت رائے سے منظور کر لیا۔ ٹیکس کٹوتیوں کے بعد اب اراکین پارلیمنٹ کی تنخواہ 2 لاکھ 18 ہزار سے بڑھا کر 5 لاکھ 19 ہزار روپے کر دی گئی۔

بل رومینہ خورشید عالم نے پیش کیا، جسے ایوان نے کثرت رائے سے منظور کر لیا۔ اس موقع پر اپوزیشن اراکین نے بل کی مخالفت کی اور نعرے بازی شروع کر دی، جس پر اسپیکر سردار ایاز صادق نے کہا کہ جو بڑھائی گئی تنخواہ نہیں لینا چاہتا، وہ تحریری طور پر آگاہ کر دے۔ انہوں نے مزید کہا کہ اپوزیشن ایک طرف پارلیمنٹ کو جعلی قرار دیتی ہے اور دوسری طرف خود سنجیدہ رویہ اختیار نہیں کرتی۔

واضح رہے کہ قومی اسمبلی کی فنانس کمیٹی پہلے ہی اراکین پارلیمنٹ کی تنخواہ اور مراعات کو وفاقی سیکریٹری کے برابر کرنے کی منظوری دے چکی تھی۔ اس اجلاس کی صدارت بھی اسپیکر سردار ایاز صادق نے کی تھی، جس کے تحت قومی اسمبلی اور سینیٹ کے اراکین کی ماہانہ تنخواہ و مراعات ٹیکس کی کٹوتی کے بعد 5 لاکھ 19 ہزار مقرر کر دی گئی ہے۔

دلچسپ بات یہ ہے کہ اس کمیٹی میں تحریک انصاف کے 67 اراکین پارلیمنٹ نے بھی تحریری طور پر تنخواہوں میں اضافے کا مطالبہ کیا تھا، جبکہ مسلم لیگ (ن) اور پیپلز پارٹی کے بیشتر اراکین پارلیمنٹ نے ایم این اے اور سینیٹرز کی تنخواہ 10 لاکھ روپے ماہانہ کرنے کی تجویز دی تھی، تاہم اسپیکر ایاز صادق نے یہ مطالبہ مسترد کر دیا تھا۔

اسلام آباد ہائیکورٹ کے جج کے بیان پراسپیکر کا سخت ردعمل

اسلام آباد ہائیکورٹ کے جج کے بیان پراسپیکرقومی اسمبلی سردارایازصادق نےسخت ردعمل دیتے ہوئے کہا کہ اگر واقعی ایسا بیان دیا گیا ہے تو جج کو سمجھنا چاہیے کہ یہ قابل قبول نہیں۔

انھوں نے کہا کہ اس طرح سسٹم نہیں چلتا، یہ پارلیمنٹ پر حملہ ہے، کسی کو پارلیمنٹ کے خلاف بیان بازی کا حق نہیں ہے۔

اسپیکرقومی اسمبلی نے وزیرقانون اعظم نذیر تارڑ کو ہدایت کی کہ جج کو پیغام پہنچایا جائے کہ اس طرح کا بیان پارلیمان پر حملہ ہے۔

اسپیکرکاعمرایوب کو جواب

قومی اسمبلی اجلاس کے دوران اسپیکر قومی اسمبلی ایازصادق نے اپوزیشن ارکان پرطنزکرتے ہوئے کہا کہ احتجاج بھی کرتے ہیں اور تنخواہیں بھی وصول کر رہے ہیں، کسی کو تنخواہ نہیں چاہیے تو بتا دے، آپ کی حکومت ہو تو اسمبلی اصلی کسی اور کی ہو تو جعلی، ایسا نہیں ہو سکتا۔

اسپیکر ایاز صادق نے عمر ایوب کی تقریر کے دوران کئی بار تحمل کا مظاہرہ کرنے کی ہدایت کی اور ان کی تقریر کے کئی الفاظ حذف کردیے۔

قومی اسمبلی کا اجلاس کل کی بجائے 18 فروری کو ہوگا۔ اس سے قبل اجلاس کل دو بجے تک کے لیے ملتوی کیا گیا تھا۔