سہ ملکی ون ڈے سیریز کے پہلے میچ میں انجری کا شکار ہونے والے پاکستان کرکٹ ٹیم کے فاسٹ بولر حارث رؤف کو جنوبی افریقا کے خلاف دوسرے میچ میں آرام دیے جانے کا امکان ہے۔

میڈیا رپورٹس کے مطابق گزشتہ روز لاہور میں نیوزی لینڈ کے خلاف کھیلے گئے سہ ملکی سیریز کے پہلے میچ میں حارث رؤف انجری کا شکار ہوکر میدان سے باہر جانا پڑا تھا، انہیں بالنگ کے دوران سینے اور پیٹ کے پٹھوں کی بائیں جانب سے شدید درد ہورہا تھا۔

قومی ٹیم کے فاسٹ بولر کو ابتدائی طبی امداد فراہم کردی گئی ہے تاہم ان کے پاکستان ٹیم کی بیٹنگ کے دوران بھی وہ میدان پر واپس نہیں آئے اور انہیں آرام دیا گیا۔

ذرائع کا بتانا ہے کہ سیریز کے پہلے میچ کے دوران بولنگ کرتے ہوئے پسلیوں کے درد کے باعث گراؤنڈ سے باہر جانے والے فاسٹ بولر حارث رؤف پہلے سے بہتر محسوس کر رہے ہیں تاہم ٹیم مینجمنٹ جنوبی افریقا کے خلاف حارث رؤف کو کھلا کر رسک نہیں لینا چاہتی۔

سہ ملکی سیریز کے پہلے میچ میں ہی حارث رؤف اور رچن ریویندرا زخمی

ذرائع کا کہنا ہے کہ جنوبی افریقا کے خلاف میچ میں حارث رؤف کو آرام دیے جانے کا امکان ہے تاہم حارث رؤف سے متعلق حتمی فیصلہ ایم آر آئی کی رپورٹس کی روشنی میں کیا جائے گا۔

ادھر قومی کرکٹ ٹیم کےکپتان محمد رضوان نے فاسٹ بولر حارث رؤف کی انجری کے حوالے سے اطمینان کا اظہار کرتے ہوئے بتایا ہے کہ ڈاکٹروں کے مطابق حارث رؤف کی انجری پریشانی کا باعث نہیں ہے، ہمیں فیلڈنگ میں تھوڑی بہتری کی ضرورت ہے۔

دوسری جانب پاکستان کرکٹ ٹیم آج لاہور سے کراچی روانہ ہوگی، پاکستان کرکٹ ٹیم کل ٹریننگ سیشن نیشنل کرکٹ اسٹیڈیم کراچی میں کرے گی جہاں جنوبی افریقا سے ان کا مقابلہ 12 فروری کو شیڈول ہے۔

یاد رہے کہ گزشتہ روز لاہور کے قذافی اسٹیڈیم میں کھیلے گئے سہ ملکی سیریز کے پہلے میچ میں نیوزی لینڈ نے پاکستان کو 78 رنز سے شکست دی تھی۔