بھارت کے امیر ترین شخصیت مکیش امبانی نے 41 کروڑ پاکستانی روپوں سے زائد مالیت کی لگژری گاڑی خرید لی۔

بھارتی میڈیا رپورٹس کے مطابق مکیش امبانی کے پاس کئی لگژری گاڑیاں موجود ہیں جن کی مالیت کروڑوں میں ہے۔

لیکن اب مکیش امبانی نے 13 کروڑ بھارتی روپے (41 کروڑ پاکستانی روپوں سے زائد)مالیت کی رولز رائس کلینن خریدی ہے۔

رپورٹس کے مطابق عام رولز رائس کلینن کی مالیت 8 کروڑ بھارتی روپے ہے لیکن مکیش امبانی کی خریدی ہوئی رولز رائس سکیورٹی کے پیش نظر بالکل مختلف ہے جس کے باعث اس کی قیمت دگنی ہے۔

بھارت کے امیر ترین شخصیت نے بلٹ پروف رولز رائس کلینن خریدی ہے جو بم دھماکے سے بھی تحفظ فراہم کرسکتی ہے۔

بھارتی میڈیا کے مطابق مکیش امبانی کی خریدی گئی گاڑی کا رنگ سلور ہے اور یہ بھارت کی پہلی بلٹ پروف رولز رائس کلینن ہے تاہم امبانی خاندان یا ان کی کمپنی کی جانب سے باقاعدہ بلٹ پروف رولز رائس کلینن خریدنے کی تصدیق نہیں ہوسکی

یاد رہے کہ رولز رائس کلینن ایک لگژری گاڑی ہے جس میں 6.75 لیٹر ٹوئن ٹربو چارجڈ وی 12 انجن ہے۔ گاڑی کی قیمت اس کی مختلف حسب ضرورت آپشنز کی وجہ سے بہت زیادہ ہے؛ اس لیے اس لگژری گاڑی کی قیمت میں اضافہ ہو گیا ہے۔

یہ بات بھی دلچسپ ہے کہ 2019 میں امبانی خاندان بھارت میں سب سے پہلے کلینن ماڈل کی گاڑی خریدنے والے بنے تھے۔

مکیش امبانی کی پہلی کلینن گاڑی بھوری رنگ کی تھی۔ پھر 2021 میں انہوں نے سفید رنگ کی گاڑی خریدی اور وقت کے ساتھ ساتھ ان کے مجموعے میں اضافہ ہوتا گیا ہے۔