دبئی آئندہ برس فضائی ٹیکسی منصوبہ شروع کرنیوالا دنیا کا پہلا شہر بننے کیلئے تیار ہے، جوبی ایوی ایشن کی تیار کردہ فضائی ٹیکسی کا پروٹو ٹائپ جاری کر دیا گیا۔

میڈیا رپورٹس کے مطابق پروٹو ٹائپ اسمارٹ، پائیدار نقل و حمل کے لیے دبئی کے وژن اور دبئی سیلف ڈرائیونگ حکمت عملی کے لیے اس کے عزم کو اجاگر کرتا ہے۔

فضائی ٹیکسی کا مقصد 2030 تک سفر کو 25 فیصد سیلف ڈرائیونگ بنانا ہے، جدید برقی ٹیکنالوجی پر مشتمل منصوبے کا مقصد کاربن کا اخراج کم کرنا اور عالمی استحکام کے مقاصد کی حمایت کرنا ہے۔

ٹرانسپورٹیشن سسٹمز کے ڈائریکٹر خالد العوادھی نے کہا کہ ہم میوزیم آف دی فیوچر میں فضائی ٹیکسی ماڈل کی نمائش کرنے پر فخر محسوس کرتے ہیں، جو متحرک شہر میں نقل و حرکت کی دوبارہ تعریف کرنے کے لیے دبئی کے عزائم اور نئی سوچ کی نشاندہی کرتا ہے۔

انہوں نے شہری نقل و حرکت میں تبدیلی کے دور کے آغاز کی نشاندہی کرتے ہوئے کہا کہ دبئی فضائی ٹیکسی منصوبے کا آغاز کرنے والا دنیا کا پہلا شہر بننے کے لیے تیار ہے، جس کی خدمت 2026 کی پہلی سہ ماہی میں شروع ہو جائے گی۔

فضائی ٹیکسی اپنی عمودی ٹیک آف اور لینڈنگ کی صلاحیتوں کے ساتھ ساتھ مسافروں کی فلاح و بہبود یقینی بنانے کے لیے حفاظت کے اعلیٰ ترین معیارات کی پاسداری کے لیے نمایاں ہے۔