اوورسیز پاکستانی گلوبل فاؤنڈیشن نے حکومت سے مطالبہ کیا ہے کہ تارکین وطن کے مسائل کو ترجیحی بنیادوں پر حل کیا جائے، گرین چینل کو بحال کیا جائے، اوورسیز پاکستانیوں کو فارن انویسٹر کا درجہ دیا جائے اور ان کے لئے سرمایہ کاری کیلئے سازگار ماحول پیدا کیا جائے، ان کی جائیدادوں پر قبضوں کا خاتمہ کرایا جائے۔

اوورسیز پاکستانی گلوبل فاؤنڈیشن کے چیئرمین ظہیر اخترمہر نے دیگر عہدیداران کے ہمراہ اسلام آباد میں میٹ دی پریس سے خطاب کرتے ہوئے کہا کہ 3 سے5 فروری تک 3 روزہ کنونشن کرنے جا رہے ہیں۔

انہوں نے کہا کہ حکومت میثاق جمہوریت کی طرح میثاق معیشت بھی کرے، تاکہ کوئی فیصلوں کو تبدیل نہ کر سکے، اوورسیز پاکستانیوں کو فارن انویسٹر کا درجہ دیا جائے اور ان کے لئے سرمایہ کاری کیلئے سازگار ماحول پیدا کیا جائے۔

ظہیر اخترمہر نے کہا کہ تارکین وطن کی پراپرٹیز پر ہونے والے قبضوں سے نجات دلائی جائے، سیکنڈ ہینڈ موبائل کو فری کیا جائے۔

چیف آرگنائزر سلمان ملک کا کہنا تھا کہ اوورسیز پاکستانیوں کے بہت سے مسائل ہیں، ان کے لئے ون ونڈو کے علاوہ ان کے تمام کیسیز کی سنوائی ترجیحی بنیادوں پر ہونی چاہیے۔