جمعیت علمائے اسلام کے رہنما سینیٹر کامران مرتضی نے مولانا فضل الرحمان اور صدر مملکت آصف زرداری میں رابطے سے متعلق وضاحت دیتے ہوئے کہا ہے کہ مولانا فضل الرحمان نے آصف زرداری سے پیکا ترمیمی بل سے متعلق بات کی تھی، صدر مملکت نے بل پر دستخط کو چند روز کے لیے مؤخر کرنے کی یقین دہانی کرائی تھی۔

صدر مملکت آصف زرداری کی طرف سے مولانا فضل الرحمان کے ذریعے پیکا ترمیمی بل 2025 سے متعلق پارلیمانی رپورٹرز ایسوسی ایشن کو دی گئی یقین دہانی سامنے آگئی۔

سینیٹر کامران مرتضی کی جانب سے سربراہ جے یو آئی مولانا فضل الرحمان اور صدر مملکت کے درمیان ہونے والی بات چیت پر اپنے آڈیو کلپ میں کہنا ہے کہ مولانا فضل الرحمان نے صدر مملکت سے پیکا ترمیمی بل سے متعلق بات کی تھی، صدر مملکت نے مولانا فضل کے کہنے پر پیکا ترمیمی بل پر دستخط کو چند روز کے لیے مؤخر کرنے کی یقین دہانی کرائی تھی۔

کامران مرتضیٰ نے مزید کہا کہ وزیر داخلہ کی واپسی پر انہیں پارلیمانی صحافیوں کے ساتھ ملاقات کا کہا گیا تھا، مولانا فضل الرحمان نے پی آر اے کے دوستوں کے لیے پیغام دیا جو پہنچا دیا۔