وزیراعلیٰ پنجاب مریم نواز نے آئندہ ماہ صوبے بھر میں 20 ہزار گھروں کی تعمیر کا ہدف دے دیا جبکہ عوام کو فری پلاٹ دینے کے لیے ٹی او آرز طے کرنے کے لیے 8 رکنی کمیٹی قائم کر دی۔

وزیراعلیٰ پنجاب مریم نواز کی زیر صدارت خصوصی اجلاس ہوا، جس میں اپنی چھت اپنا گھر پروگرام کے منصوبے پر پیش رفت کا تفصیلی جائزہ لیا گیا۔

اجلاس میں پنجاب میں بے گھر شہریوں کو مفت پلاٹ دینے کے لیے اسکیم کا تفصیلی جائزہ بھی لیا گیا، سفارشات اور تجاویز پر غور کر کے 9 ہزار 15 مکانوں کی تعمیر کے لیے 8 ارب 20 کروڑ روپے کے قرضے جاری کیے گئے۔

اجلاس میں بریفنگ دیتے ہوئے بتایا گیا کہ 2050 افراد کو مکانات کی تعمیرات کے لیے قرض کی دوسری قسط بھی مل گئی، اپنی چھت اپنا گھر پروگرام کے تحت 4841 گھر زیر تکمیل ہیں، اپنی چھت اپنا گھر پورٹل پر وزٹ کرنے والے شہریوں کی تعداد 7 لاکھ 28 ہزار سے بڑھ گئی ہے۔

بریفنگ کے مطابق اپنی چھت اپنا گھر پروگرام کے لیے تقریباً 4 لاکھ سے زائد درخواستیں مکمل دستاویزات کے ساتھ آ گئی ہیں، 74 ہزار سے زائد ڈرافٹ درخواستیں بھی اپنی چھت اپنا گھر پورٹل میں جمع ہیں۔

وزیراعلیٰ پنجاب مریم نواز کی ہدایت پر 3 اور 5 مرلے کی ہاؤسنگ اسکیموں کا تفصیلی جائزہ لیا گیا، عوام کو فری پلاٹ دینے کے لیے ٹی او آرز طے کرنے کے لیے 8 رکنی کمیٹی قائم کر دی گئی، وزیراعلیٰ نے پنجاب میں گھر بنانے کا ہدف پورا کرنے کا حکم دے دیا۔