پاکستان پیڈیاٹرکس ایسوسی ایشن کے صدر ڈاکٹر وسیم جمالوی نے کہا ہے کہ بچوں میں نمونیا، سانس کی نالی کے انفیکشن اور دیگر امراض میں اضافہ ہو رہا ہے۔ انہوں نے نجی ٹی وی سے گفتگو میں کہا کہ سول اسپتال میں جون سے دسمبر تک سانس کے امراض کے 4 ہزار سے زائد کیسز رپورٹ ہوئے ہیں۔

ڈاکٹر وسیم جمالوی کے مطابق سول اسپتال میں جون سے دسمبر تک ایک ہزار بچوں میں نمونیا کی تصدیق ہوئی۔ انہوں نے والدین کو مشورہ دیا کہ بچوں کو گرم کپڑوں میں رکھیں اور ٹھنڈی ہوا سے بچائیں۔ انہوں نے کہا کہ بند کمروں میں تازہ ہوا کی آمد کو یقینی بنائیں اور بچوں کو بار بار ہاتھ دھونے کی عادت ڈالیں۔

ڈاکٹر وسیم جمالوی نے مزید کہا کہ بیمار بچوں کو اسکول بھیجنے سے گریز کریں اور وائرل انفیکشن سے بچاؤ کے لیے ویکسینیشن پر توجہ دیں۔ ان کا کہنا تھا کہ سردیوں کے موسم میں بچوں کی صحت کے حوالے سے احتیاطی تدابیر اختیار کرنا ضروری ہیں تاکہ ان کی صحت کو بہتر رکھا جا سکے۔