لیاری آٹھ چوک کے قریب کریکر دھماکے میں ایک شخص زخمی ہوگیا۔

پولیس کے مطابق لیاری آٹھ چوک النور ہوٹل والی گلی کے قریب کریکر دھماکے میں زخمی ہونیوالے شخص کو سول اسپتال منتقل کردیا گیا، زخمی کی شناخت علی محمد کے نام سے ہوئی ہے۔

ایس ایس پی سٹی کریکر دھماکے کے بعد جائے وقوعہ پر پہنچ گئے، عارف عزیز نے کہا کہ دھماکے کی نوعیت کے حوالے سے بی ڈی ایس کو طلب کیا ہے۔

عارف عزیزکے مطابق دھماکہ زیر تعمیر عمارت کے اندر ہوا ہے، زخمی ہونے والا شخص مزدور ہے، جسے سول اسپتال سے طبی امداد کے بعد گھر روانہ کر دیا گیا۔

ایس ایس پی سٹی نے بتایا کہ زیر تعمیر عمارت کے مالک کو بھتے کی پرچی یا کال موصول نہیں ہوئی، زخمی شخص کے بیان کے بعد صورتحال واضع ہوگی، واقعہ کے حوالے مزید تحقیقات جاری ہیں۔