انٹرنیٹ کی سست روی اور بار بار تعطل کی وجہ سے واٹس ایپ سمیت متعددعالمی کمپنیوں نے اپنے مختلف آپریشنز پاکستان سے باہر منتقل کرنے شروع کردئے ہیں۔

پی ٹی اے کی دستاویز کے مطابق انٹرنیٹ کی حالیہ بندش کے باعث واٹس ایپ نے اپنا سیشن سرور راؤٹنگ باہر منتقل کردیا۔

پی ٹی اے کا کہنا ہے کہ واٹس ایپ کے سی ڈی این کی بیرون ملک منتقلی کے باعث صارفین کو سروس کی فراہمی متاثر ہوئی اور واٹس ایپ صارفین کو رابطے کرنے میں دشواریوں کا سامنا کرنا پڑا۔

پی ٹی اے نے دعویٰ کیا کہ ملک میں فکسڈ لائن اور موبائل نیٹ ورکس پر انٹرنیٹ بہتر ہوا ہے۔

پی ٹی اے کے مطابق ایک ماہ میں فکسڈ لائن انٹرنیٹ دو درجے بہتر ہوا ہے اور فکسڈ لائن انٹرنیٹ کی سپیڈ میں پاکستان 139 ویں نمبر پر ہے۔

پی ٹی اے کا کہنا ہے کہ موبائل نیٹ ورک تین درجے بہتر ہوئی ہے، موبائل نیٹ ورک میں پاکستان کی رینکنگ 97 نمبر پر ہے۔