بھارت کے شہر ممبئی میں بیٹی کیلئے کھانا آرڈر کرنے والی بزرگ خاتون ڈیڑھ کروڑ کے فراڈ کا شکار ہوگئیں۔

بھارتی میڈیا رپورٹس کے مطابق سائبر فراڈ کا آغاز چند ہفتے قبل اس وقت شروع ہوا جب 78 سالہ بزرگ خاتون نے امریکا میں مقیم بیٹی کو کورئیر سروس کے ذریعے کھانا بھیجا۔

میڈیا رپورٹ کے مطابق بذریعہ کورئیر سروس کھانا بھیجنے کے اگلے دن بزرگ خاتون کو کورئیر کمپنی سے منسلک بتاتے ہوئے ایک فراڈیے کی کال موصول ہوئی، کال پر موجود شخص نے خاتون پر الزام لگایا کہ ان کے کورئیر میں کھانے کے علاوہ غیر قانونی اشیا موجود تھیں۔

آن لائن فراڈ سے کوئی محفوظ نہیں، بھارتی آئی ٹی ایکسپرٹ 20 لاکھ روپے گنوا بیٹھا

فراڈیے نے بزرگ خاتون کو بتایا کہ ان کے کورئیر میں کریڈٹ کارڈ، میعاد ختم ہوئے پاسپورٹ، کریڈٹ کارڈز اور غیر قانونی اشیاء سمیت 2ہزارامریکی ڈالر بھی موجود تھے اور اس سازش میں خاتون اکیلی نہیں بلکہ دو افراد اور بھی شامل ہیں جس کے بعد قانونی اہلکاروں کا روپ دھارے کئی افراد نے خاتون سے رابطہ کیا حتیٰ کہ پولیس کی وردیاں پہن کر ملزمان نے خاتون کو ویڈیو کالز بھی کیں اور ان کے وارنٹ گرفتاری بھی دکھائے۔

گاڑی فروخت کے آن لائن اشتہارات کے ذریعے لاکھوں کے فراڈ میں ملوث ملزم گرفتار

میڈیا رپورٹ میں بتایا گیا ہے کہ دباؤ میں آکر بزرگ خاتون نے ان ملزمان کو بینکنگ تفصیلات فراہم کردیں جس کے بعد فراڈیوں نے خاتون کے بینک اکاؤنٹس سے ڈیڑھ کروڑ بھارتی روپے اپنے اکاؤنٹ میں منتقل کر دیے۔

خاتون نے جب اس واقعے کا ذکر اپنے رشتے داروں سے کیا تو انھیں بتایا گیا کہ وہ سائبر فراڈ کا شکار ہوگئی ہیں جس کے بعد خاتون نے پولیس کو اطلاع دی اور پولیس نے تفتیش کا آغاز کردیا ہے تاہم ملزمان تاحال قانون کی گرفت سے باہر ہیں۔