آرمی چیف کی زیر قیادت افواج پاکستان نے 2024 میں ملک کے لیے شاندار خدمات انجام دیں، دہشت گردوں کے خلاف 59 ہزار 775 کامیاب آپریشنز کیے گئے جس میں 925 دہشت گردوں بشمول خوارج کو ہلاک کیا گیا۔

جاری اعلامیہ کے مطابق آرمی چیف نے واضح کیا ہے کہ قواعد و ضوابط کے بغیر آزادی اظہارِ رائے معاشرتی اخلاقیات کی تنزلی کا باعث بن رہی ہے۔

اس سال دہشت گردوں اور خوارج کے خلاف واضح پالیسی کے تحت اہم کامیابیاں حاصل کی گئیں۔ 925 دہشت گرد اور خوارج جہنم واصل ہوئے۔ 73 انتہائی مطلوب دہشت گردوں کو ہلاک کیا گیا۔

روزانہ 169 سے زائد آپریشنز کیے جا رہے ہیں، جبکہ 14 مطلوب دہشت گردوں نے ہتھیار ڈال کر قومی دھارے میں شمولیت اختیار کی۔

آرمی چیف کا موقف

آرمی چیف جنرل سید عاصم منیر نے کہا کہ پاکستان کو افغان سرزمین سے دہشت گرد کارروائیوں پر تحفظات ہیں۔ ان کا کہنا ہے کہ ایک، ایک پاکستانی کی جان اور حفاظت ہمارے لیے مقدم ہے۔

سال 2024 میں ایک غیر ملکی جریدے نے آرمی چیف کو دہشت گردوں اور انتہا پسندوں کے خلاف توانا آواز بننے پر خراج تحسین پیش کیا۔ آرمی چیف کی کامیاب ملٹری ڈپلومیسی کے باعث پاکستان نے اہم سنگ میل عبور کیے ہیں، اور غزہ، لبنان اور کشمیر کے مظلوم عوام کے لیے پاکستان ایک مؤثر آواز کے طور پر اُبھرا ہے۔

معاشی چیلنجز اور قانون سازی

معاشی چیلنجز سے نمٹنے کے لیے ایس آئی ایف سی نے اہم کامیابیاں حاصل کیں، اور غیر قانونی سرگرمیوں کے خلاف بھرپور کارروائیاں کی گئیں۔ گمراہ کن پروپیگنڈا اور فیک نیوز کی روک تھام کے لیے قانون سازی بھی کی گئی۔

مستقبل کی حکمت عملی

حکومت اور عسکری قیادت کی بہترین حکمت عملی سے سال 2025 امن و استحکام کا سال ہوگا، جو کہ پاکستان کے لیے ایک نئی امید کا پیغام ہے۔